ललितपुर जिल्ला बचत तथा ऋण सहकारी संघले लेखा सुपरीवेक्षणको क्षमता अभिवृद्धिका लागि आजबाट दुई दिने तालिम शुरु गरेको छ । ललितपुर महानगरपालिका सहकारी शाखाको आयोजना तथा संघको संयोजनमा निःशुल्क तालिम शुरु भएको हो ।
तालिमको उद्घाटन ललितपुर महानगपालिकाका सहकारी तथा उद्योग शाखा प्रमुख देव गुरागाईंले गरेका थिए । कार्यक्रमको उद्घाटन गर्दै गुरागाईंले सहकारीका सञ्चालक, लेखा समिति तथा व्यवस्थापकहरुको क्षमता अभिवृद्धि गरी संस्थाहरुमा सुशासन कायम गर्न तालिमको आयोजना गरिएको बताए ।
महानगरपालिका भित्र रहेका १२० वटा सहकारीका लेखा समिति संयोजकलाई ३० जनाका दरले ४ पटक दुईदिने तालिम दिइने भएको छ ।
संघले योसँगै दोस्रो तालिम फागुन १२ र १३ गते, तेस्रो तालिम फागुन १९ र २० गते र चौथो तालिम फागुन २६ र २७ गते संचालन गर्ने भएको छ । संघका व्यवस्थापक सन्तोष बजगाईंले महानरपालिकासँगको समन्वयमा संघले विभिन्न तालिम दिन लागेको बताए । पहिलो चरणमा लेखा समिति, दोश्रो चरणमा संस्थाका सञ्चालक र तेश्रो चरणमा व्यवस्थापहरुलाई तालिम दिइने जनाए ।
संघले तालिमका लागि संयोजन मात्र गरेको सम्पूर्ण व्यवस्थापन भने महानगरपालिकाको रहेको उनले बताए । हरेक तालिममा १२० वटा सहकारी संस्थालाई सहभागि गराइनेछ । लेखा समितिलाई सक्रिय बनाउँदा संस्थाहरुको आन्तरिक सुशासन बलियो हुने भएकाले पहिलो चरणको तालिम लेखासमितिबाट शुरु गरिएको उनको भनाई छ । हरेक साताको बिहिबार र शुक्रबार तालिम हुने हुँदा ईच्छुक संस्थाले तालिममा सहभागि हुन संघमा जानकारी पठाउन समेत उनले आव्हान गरे ।
तालिम संघको भवनबाटै सञ्चालन भइरहेको छ ।
