बालाजी बचत तथा ऋण सहकारी संस्थाले आफ्नो १४औं वार्षिक साधारणसभा सम्पन्न गरेको छ । संस्थाको हालै सम्पन्न वार्षिक साधारणसभाले अध्यक्षको प्रतिवेदन, आर्थिक प्रतिवेदन र लेखा समितिको प्रतिवेदन पारित गरेको छ । सभामा अध्यक्ष टंकप्रसाद तिमल्सिनाले संस्थाको मुख्य उद्देश्य नै बचत तथा ऋण भएकाले सदस्यहरुको बचत र शेयरमा उचित प्रतिफल प्रदान गर्नु भएको बताए । त्यसैगरी सदस्यहरुलाई सहुलियत दरमा कर्जा प्रदान गरी उनीहरुको व्यापार व्यवसायमा वृद्धि गरी आर्थिक स्तरोन्नतिमा सघाउ पु¥याउनु रहेको उनले जनाए ।
संस्था स्थापना भएको १४ वर्ष पुगेपनि सञ्चालनमा आएको ५ वर्षको अवधिमा उल्लेख्य फड्को मार्न सकेको अध्यक्ष तिमल्सिनाको भनाई छ । संस्थाले गत आर्थिक वर्षको असार मसान्तसम्म १ करोड २९ लाख शेयरपुँजी ११ करोड ४५ लाख बचत संकलन र ११ करोड ६६ लाख ऋण लगानी गरी कुल कारोबार १४ करोड ४० लाख पुर्याउन सफल भएको छ । संस्थाले कर्जा सुरक्षण कोषमा ११ लाख ६६ हजार रकम छुट्याएको छ । त्यसैगरी संस्थाले समय र बजारको परिस्थिति अनुरुप ब्याजदरमा फेरबदल गर्दै बचतऋणका नयाँ स्किम ल्याउने, सदस्य र कर्मचारीहरुको क्षमता अभिवृद्धिका लागि तालिम दिने योजना बनाएको छ ।
सभामा लेखा समितिको तर्फबाट संयोजक विष्णुप्रसाद दुलालले प्रतिवेदन प्रस्तुत गर्दै सामुहिक जमानी कर्जालाई न्यूनिकरण गरी धितो कर्जालाई प्राथमिकता गर्नुपर्ने औंल्याए । संस्थाले व्यापारव्यवसाय, हायरपर्चेज, मुद्दती धितो रसिद, सामुहिक जमानी, महिला उद्यमी जस्ता विविध शीर्षकमा ऋण लगानी गर्दै आएको छ भने मासिक, आवधिक, ३६५ दिने, १८० दिने मुद्दती जस्ता बचत योजना सञ्चालनमा ल्याएको छ ।
