सबल महिला बहुउद्देश्यीय सहकारी संस्थाको सातौं बार्षिक साधारण सभा सम्पन भएको छ । यहि मंसिर १८ देखि २१ गतेसम्म संस्थाले कार्यालय प्रांगणमा सदस्य उपस्थिति खुल्ला गरि साधारण सभा सम्पन गरेको हो । सदस्यहरुलाई बार्षिक प्रतिबेदन बितरण गरी उनीहरुबाट आएको सुझावलार्इ समेत समेटेर सभा समापन गरिएको संस्थाले जनाएको छ ।
सभामा मन्तव्य साख्दै अध्यक्ष इश्वरी हुमागाईंले सदस्यहरुको विश्वास र सहभागिताले संस्थामा आइपरेका कठीन परिस्थितिलाई पार गदै संस्था निरन्तर गतिमा बढेको बताइन् । सदस्यहरुलाई व्यवसायीकरणमा जोडी उत्पादनमा लगाउन संस्था लागि परेको उनको भनाइ छ । सदस्यहरुको आयस्रोतमा बृद्धि गर्न गाइपालन, कुखुरापालन ,बाख्रापालन जस्ता व्यवसायमा लगाई त्यसबाट उत्पादन भएका मासु ,अण्डा, पनिर र अर्गानिक तरकारी सदस्यहरु माझ बिक्री वितरण गर्दै आएको हुमागाईले सभामा जानकारी दिइन् । संस्थामा आवद्ध सदस्यहरुको जीवनस्तर उठाउन आफुहरु लागिपरेको उनले सुनाइन् ।
संस्थाकी प्रबन्धक गिता फुल्लेलले सदस्यहरुको चाहना अनुरुप नै संस्थाले काम गर्दै आएको र सदस्यको आर्थिक अवस्थामा सुधार ल्याउन संस्था लागि परेको उल्लेख गरिन् । सहकारीमार्फत लघुवित कार्यक्रम सञ्चालन गरी समाजमा पछाडि परेका महिलाहरुलाई समुहमा आबद्ध गराइ उनीहरुलाई सबल बनाउन संस्थाले भूमिका खेल्दै आएको उनको भनाइ छ ।
सभामा सचिव विश्वेश्वरी पनेरुले बार्षिक प्रतिवेदन र कोषाध्यक्ष संचिता ढकालले आर्थिक प्रतिवेदन सभामा प्रस्तुत गरेका थिए । संस्थाले गत आबको अन्त्यसम्ममा १ करोड ७१ लाख ३८ हजार शेयर पुँजी, ३ करोड ९६ लाख ७२ हजार बचत संकलन र ४ करोड ९९ लाख ऋण लगानी गरेको छ । संस्थाको विभिन्न कोषमा ८ लाख ८० हजार जम्मा भएको छ भने, संचालन मुनाफा ४ लाख ४९ हजार रहेको छ । गत बर्ष संस्थाले ७ करोड ४ लाख ९७ हजार कुल कारोबार गरेको प्रतिवेदनमा उलेख्य छ । संस्थामा १३ सय सदस्य आवद्ध रहेका छन् ।
संस्थाले सामाजिक उत्तरदायित्व बहन गर्ने उद्देश्यले सदस्यहरुको माग र सहभागितामा सिर्जनशील सबल समाज नामक समाज समेत गठन गरेको जनाएको छ । उक्त समाजले मेलाम्चीका बाढी पीडितलाई एक लाख रुपैया आर्थिक सहयोग गरेको थियो । संस्थाले कोभिड १९ का कारण मृत्यु भएका सदस्यहरुको ऋणमा केहि छुट गर्नुका साथै लकडाउन अवधिभर सम्पूर्ण ऋणीहरुको ब्याजमा समेत छुट दिएको जनाएको छ । संस्थाले गत आ.व.मा बनाएका योजनाहरुको सफल कार्यान्वयन गर्दै यस आ.व. का लागि केहि लक्ष्य तथा योजनाहरु समेत बनाएको छ ।
