काभ्रेको पनौतीमा मुख्य कार्यालय रहेको नवदुर्गा बचत तथा ऋण सहकारी संस्थाका प्रमुख कार्यकारी अधिकृत दिपक तिमल्सिना पुरस्कृत भएका छन् । बागमती प्रदेश बचत तथा ऋण सहकारी संघ (बागमती प्रोस्कून) ले ७ औं स्थापना दिवस तथा ६ औं वार्षिकोत्सवको अवसरमा बागमती प्रदेशकै उत्कृष्ट सिईओको रुपमा तिमल्सिनालाई सम्मान तथा पुरस्कृत गरेको हो ।

संघका अध्यक्ष उद्धव सापकोटाको सभापतित्वमा भएको कार्यक्रममा बागमती प्रदेश, भौतिक पूर्वधार विकास मन्त्री विना रायमाझी पौडेलले सिईओ तिमल्सिनालाई सम्मान तथा पुरस्कार प्रदान गरेकी थिइन् ।  २०६१ सालमा श्री नवदुर्गा साकोसको कर्मचारीको रुपमा सहकारी क्षेत्रमा प्रवेश गरेका उनले यस क्षेत्र दुई दशक भन्दा लामो विताई सकेका छन् । व्यवस्थापनमा स्नाकोत्तर र कानुनमा स्नातकसम्मको अध्ययन गरेका तिमल्सिना बैंक तथा वित्तीय संस्थाको पहुँचबाट टाढा रहेका विपन्न र न्युन आय भएका वर्गको सहकारी मार्फत् आर्थिक तथा सामाजिक रुपान्तरण गर्न सक्ने बताउँछन् । 

सहकारी मार्फत् सदस्य र मुलुकको आर्थिक रुपान्तरण सम्भव भएको भन्दै उनले यो सम्मानले यहि क्षेत्रमा लागि रहन थप हौसला र उर्जा मिलेको बताए । गत बर्ष मात्रै जिल्ला सहकारी संघ  काभ्रेले उनलाई जिल्लाकै  सर्वोकृष्ट सहकारी कर्मचारी सम्मान  प्रदान गरेको थियो। सिईओ तिमल्सिनाले नेतृत्व गरेको सहकारी संस्थामा १० हजार ३ सय माथि शेयर सदस्य आवद्ध रहेका छन् भने कुल सम्पत्ति १ अर्ब २३ करोड नाघेको छ ।