अग्रज महिला बचत तथा ऋण सहकारी संस्थाले चाँगुनारायण मन्दिर परिसर सरसफाई गरेको छ । संस्थाले सामाजिक उत्तरदायित्व अन्तर्गत हरिबोधनी एकादशीको अवसरमा पारेर मन्दिर परिसरको फोहोर व्यवस्थापना र दियो सफा गरेको संस्थाकी व्यवस्थापक तुलसा खड्काले जानकारी दिइन् । चाँगुनारायण नगरपालिका–५, पिखेलमा रहेको संस्थाले समयसमयमा सामाजिक गतिविधिहरु सञ्चालन गर्दै आएको उनले बताइन् ।
संस्थाले मंसिर ३ र ४ गते सदस्यहरुलाई कुशेश्वर र हलेसी महादेवको दर्शन गराउने भएको छ । त्यसैगरी संस्थाको स्थापना दिवसको अबसर पारेर आगामी मंसिर १५ गते करिब ६५ जना ज्येष्ठ सदस्यलाई तीर्थाटन लैजाने तयारी गरेको उनले जानकारी दिईन । संस्थाले गत बर्ष पनि जेष्ठ सदस्यलाई सम्मान कार्यक्रम आयोजना गरेको थियो ।
संस्थाले महिला सदस्यहरुको आर्थिक स्तरमा सुधार ल्याउन सीपमूलक र चेतनास्तरमा विकास गर्न चेतनामूलक कार्यक्रमहरु समेत सञ्चालन गर्दै आएको छ ।
झण्डै २ हजार महिला सदस्यहरुलाई समेटेर संस्थाले सेवा दिँदै आएको छ भने संस्थाको कुल वासलात ९ करोडको हाराहारीमा पुगेको छ ।
