चालु आर्थिक वर्षको असोजमसान्तमा खाद्यान्नको मुल्यमा उल्लेख्य वृद्धि भएको नेपाल राष्ट्र बैंकले जनाएको छ ।
अघिल्लो आर्थिक वर्षको तुलनामा यस आर्थिक वर्षको पहिलो ३ महिनामा घ्यू तथा तेलमा ३१.६८ प्रतिशत, माछा तथा मासुमा ११.९३ प्रतिशत, दाल तथा गेडागुडीमा १०.७१, सुर्तीजन्य वस्तु र गैर–मदिराजन्य पेय पदार्थ ९.६३ प्रतिशतले मुल्य बढेको हो । नेपाल राष्ट्र बैंकले देशको आर्थिक तथा वित्तीय अवस्था सार्वजनिक गर्दै यस्तो विवरण दिएको हो ।
२०७८ असोज महिनामा वार्षिक बिन्दुगत उपभोक्ता मुद्रास्फीति ४.२४ प्रतिशत रहेको छ । अघिल्लो वर्षको सोही महिनामा यस्तो मुद्रास्फीति ३.७९ प्रतिशत रहेको थियो । समीक्षा महिनामा खाद्य तथा पेय पदार्थ समूहको मुद्रास्फीति ३.६३ प्रतिशत र गैर–खाद्य तथा सेवा समूहको मुद्रास्फीति ४.७२ प्रतिशत रहेको छ ।
यस अवधिमा काठमाडौं उपत्यकामा ३.४८ प्रतिशत, तराईमा ४.०१ प्रतिशत, पहाडमा ५.६८ प्रतिशत र हिमालमा ३.१२ प्रतिशत मुद्रास्फीति रहेको छ । २०७७ असोजमा यी क्षेत्रहरुमा क्रमशः ३.३५ प्रतिशत, ४.४६ प्रतिशत, ३.०३ प्रतिशत र ४.३९ प्रतिशत मुद्रास्फीति रहेको थियो ।
२०७८ असोजमा वार्षिक बिन्दुगत थोक मुद्रास्फीति ३.८३ प्रतिशत रहेको छ । अघिल्लो वर्षको सोही महिनामा यस्तो मुद्रास्फीति ८.२६ प्रतिशत रहेको थियो । समीक्षा महिनामा उपभोग्य वस्तु, मध्यवर्ती वस्तु र पुँजीगत वस्तुको थोक मूल्यवृद्धि क्रमशः २.११ प्रतिशत, ४.५५ प्रतिशत र ५.८६ प्रतिशत रहेको छ । समीक्षा महिनामा निर्माण सामग्रीको थोक मूल्यवृद्धि १२.३२ प्रतिशत रहेको छ ।
त्यसैगरी वार्षिक विन्दुगत उपभोक्ता मुद्रास्फीति नेपालमा ४.२४ प्रतिशत र सन्२०२१ अक्टोबरमा भारतमा ४.४८ प्रतिशत रहेको छ ।
