वित्तीय क्षेत्रमा भइरहेको तीब्र प्रतिस्पर्धाका बावजुद पनि बनेपामा रहेको एकता बचत तथा ऋण सहकारी संस्थाले आफ्ना सदस्यहरुलाई सुलभ र सहज हिसाबले सेवा प्रदान गर्दै आएको छ । संस्थाका अध्यक्ष स्वयंकाजी पोतेले बढ्दो वित्तीय बजारलाई दृष्टिष्गत गरी सहकारी मुल्य र मान्यता अनुरुप सदस्यहरुको माग, चाहना र हितलाई मध्यनजर गरी संस्थाले विभिन्न सुविधाहरु प्रदान गर्दै आएको बताए ।
संस्थाको हालै सम्पन्न १४औं वार्षिक साधारणसभामा मन्तब्य राख्दै अध्यक्ष पोतेले कोभिड–१९ का कारण व्यापार व्यवसाय र आर्थिक गतिविधिमा असर पर्दा संस्थाको कारोबारमा समेत केहि असर पर्न गएको बताए । पारस्परिक आर्थिक सहयोग अभिवृद्धि गर्ने, सदस्यहरुलाई रोजगारी तथा कार्यका लागि साधनश्रोत र सहयोग सरल ढंगबाट उपलब्ध गराउन संस्था क्रियाशील भएको सो अवसरमा उनले जानकारी दिए । संस्थाकी सचिव शर्मिला प्रधानले आ. व . २०७७।७८ को वार्षिक प्रतिवेदन प्रस्तुत गर्दै संस्थामा २१०० शेयर सदस्य पुगेको जानकारी दिइन् । त्यसैगरी ५६४ बाल सदस्यबाट १ करोड ४१ लाख ९ हजार गत असारमसान्तसम्म संकलन भएको, ७६८ जना सदस्यलाई ऋण प्रवाह गरेको र ३३६ जना सदस्यमा अहिले पनि ऋण लगानी रहेको उनले बताइन् ।
संस्थाले यस आ.व. मा सञ्चालक तथा कर्मचारीको नेतृत्व विकासका लागि तालिमको आयोजना गर्ने, स्वास्थ्य तथा सामाजिक क्रियाकलापहरुलाई निरन्तरता दिने, मोबाइल बैंकिङ सुविधा सञ्चालनमा ल्याउने, ज्येष्ठ सदस्यलाई तीर्थाटन र बालसदस्यलाई शैक्षिक भ्रमण गराउने जस्ता योजना रहेको उनले बताइन् । संस्थाका कोषाध्यक्ष विष्णु ओम पोतेले आर्थिक प्रतिवेदन प्रस्तुत गर्दै गत असार मसान्तमा शेयरपुँजी १ करोड ३ लाख, बचत संकलन १३ करोड ८९ लाख ५३ हजार ऋण लगानी १६ करोड ३१ लाख गरी १५ लाख ८५ हजार मुनाफा आर्जन गरेको बताए । जगेडा तथा विभिन्न कोषहरुमा गरी संस्थाको १६ लाख रकम रहेको छ ।
संस्थाले कृषि, हायरपर्चेज, सामुहिक जमानी, व्यापारिक, आवधिक, शैक्षिक र छोटो अवधिका शीर्षकमा ऋण प्रवाह गर्दै आएको छ ।
