प्रधानमन्त्री सुशीला कार्कीले देशको अर्थतन्त्र उकास्ने भनेकै नीजि क्षेत्र भएको बताएकी छन् ।  व्यवसायीलाई पनि मर्यादित र असल ढंगमा व्यापार व्यवसाय गर्न उनले आग्रह गरिन् । ‘यो सरकार ठूलो नीतिगत फड्को मार्न आएको होइन । कानुन बदल्ने अधिकार समेत यो सरकालाई छैन,’ कार्कीले भनिन्, ‘जेनजी आन्दोलनको जगमा बनेको यो सरकारले सम्मानीय राष्ट्रपतिबाट प्राप्त कार्यदेशअनुसार सुशासनको जग बसाल्दै राजनीतिक स्थायीत्वमा काम गरिरहेको छ ।’ उनले सोहीअनुसार वर्तमान सरकारले काम गरिरहेको बताइन् । 

ढलेका निजी क्षेत्रका संरचना पुनर्निमाण भएमा फेरि जल्दैनन् भन्ने ग्यारेन्टी दिन तयार हुने प्रतिबद्धता सबैले जनाउन आवश्यक भएको कार्कीको भनाइ छ । ‘उद्यमी व्यवसायीलाई द्रुत सेवा र सुरक्षा प्रदान गर्ने सुनिश्चिततासहित बन्द हडताल, तोडफोड आगजनी लगायतका कुरा नहुने वातावरण बनाऔं,’ कार्कीले भनिन्, ‘यसका लागि मेरो मन्त्रिपरिषद सदस्यसँग छलफल गरी आवश्यक निर्णय लिने जानकारी गराउन चाहन्छु ।’