नेपालपत्र संवाददाता
मधेश प्रदेश रहेका सहकारी संस्थाहरु कुल पुँजीमा ह्रास आएको छ । नेपाल राष्ट्र बैंकले प्रकाशित गरेको मधेश प्रदेशको आर्थिक गतिविधि अध्ययनले सहकारी क्षेत्रको कुल पुँजीमा ह्रास आएको देखाएको छ । राष्ट्र बैंकले आर्थिक वर्ष २०८१/८२ मा उक्त प्रदेशका सहकारीहरु मध्ये नमुना छनौटमा परेका १० वटा सहकारी संस्थाबाट प्राप्त विवरणको आधारमा सहकारीको अवस्था विश्लेषण गरेको थियो ।
२०८२ असार मसान्तसम्ममा छनौटमा परेका सहकारीहरुको कुल पुँजीमा २०.०२ प्रतिशतले कमी आई रु.२ अर्ब ६ करोड २० लाख कायम भएको प्रतिवेदनमा उल्लेख छ । गत आर्थिक वर्षको सोही अवधिमा कुल पुँजीमा १.५४ प्रतिशतले कमी आएको थियो । २०८२ असार मसान्तसम्ममा छनौटमा परेका सहकारीहरुको कुल बचत रु.५ अर्ब ८८ करोड ४२ लाख पुगेको छ । त्यसैगरी गत असार मसान्तसम्ममा छनौटमा परेका सहकारी संस्थाहरुबाट भएको ऋण प्रवाहमा ५.६० प्रतिशतले वृद्धि भई रु.३ अर्ब ६२ करोड ५ लाख रहेको छ ।
गत वर्षको सोही अवधिमा ऋण प्रवाहमा ३५.२१ प्रतिशतले कमी आएको थियो । गत असार मसान्तसम्ममा छनौटमा परेका सहकारी संस्थाका कुल सदस्य संख्या १.३२ प्रतिशतले घट्न गई ५८ हजार ४ सय ५६ कायम भएकोछ । २०८२ असार मसान्तसम्ममा छनौटमा परेका सहकारी संस्थाका कर्मचारी संख्यामा २.४२ प्रतिशतले कमी आएको छ । गत वर्षको सोही वर्षमा कर्मचारी संख्यामा १२.०६ प्रतिशतले कमी आएको थियो ।
