भक्तपुरको जगातिमा रहेको श्रद्धा बचत तथा ऋण सहकारी संस्थाको साधारणसभा सम्पन्न भएको छ । संस्थाले हालै १४औं साधारणसभा सम्पन्न गरेको हो ।
सभामा संस्थाका अध्यक्ष सीताराम तजलेले मन्तब्य राख्दै खर्च गरेर बाँकी बचेको ससानो रकम सदस्यहरुबाट बचतको रुपमा संकलन गरी संस्थाले व्यापारव्यवसाय र रोजगारी सिर्जना, स्वरोजगार बन्ने, आम्दानी बढाउने र जीवनयापनलाई सहज बनाउने कार्यका लागि लगानी गर्दै आएको बताए । सदस्यहरुको सक्रिय सहभागिता र अटुट विश्वासका कारण संस्था सबलतातर्फ उन्मुख भएको उनले बताए ।
सचिव बलराम ग्वाछाले वार्षिक प्रतिवेदन प्रस्तुत गर्दै संस्थाले आर्थिक वर्ष २०७७।७८ भर गरेका गतिविधिका बारेमा सदस्यहरुलाई जानकारी गराएका थिए । संस्थाले सदस्यहरुका लागि घरदैलो कार्यक्रम गरी ऋण लगानीलाई व्यवसायिक र व्यवहारिक बनाउन तथा बचत वृद्धिमा समेत उत्प्रेरित गरेको उनले जनाए । त्यसैगरी सदस्यहरुलाई मृतक राहत कोष वापत आर्थिक सहयोग, कोरोना सम्बन्धी सचेतना कार्यक्रम, घरजग्गा नापजाँच तालिम, ज्येष्ठ सदस्यहरुलाई अवलोकन भ्रमण तथा बनभोज आयोजना गरिएको उनले जनाए । यस आर्थिक वर्षमा ऋणलाई सुरक्षित र विविधिकरण गर्ने, समीक्षा गोष्ठी गर्ने, स्थापना दिवस मनाउने जस्ता कार्यक्रम रहेको उनले जनाए ।
संस्थाकी कोषाध्यक्ष मैयाकेशरी सुवालले आ.व. २०७७।७८ को आर्थिक प्रतिवेदन प्रस्तुत गर्दै २ हजार १६ सदस्य, २८४ बाल बचतकर्ता, शेयर पुँजी १ करोड ४३ लाख ४३ हजार, बचत संकलन १४ करोड ३९ लाख ७१ हजार बचत संकलन र १५ करोड १८ लाख ९२ हजार ऋण लगानी गरिएको जानकारी दिइन् । संस्थाले व्यापारिक, घरजग्गा धितो र शेयर तथा आवधिक धितोमा ऋण लगानी गर्दै आएको छ ।
संस्थाका लेखा सुपरिवेक्षण समितिका संयोजक रवि सुवालले समितिको प्रतिवेदन प्रस्तुत गर्दै ऋण प्रवाहका साथै कर्जा असुलीमा सुधार गर्न, सदस्य वृद्धिका लागि ध्यान दिन, सदस्यहरुले दिएका सुझावलाई कार्यान्वयन गर्न सुझाएका थिए ।
