ललितपुर, राष्ट्रिय सहकारी बैंक लिमिटेडले आफ्नो संगठनात्मक संरचना र व्यवस्थापन प्रणाली सुदृढ बनाउन परामर्शदाता नियुक्त गर्न शिलबन्दी प्रस्ताव आह्वान गरेको छ।

बैंकले मंगलबार सार्वजनिक गरेको सूचनाअनुसार, परामर्श सेवाले विद्यमान संरचना, व्यवसाय प्रक्रिया, मानव स्रोत व्यवस्थापन र संस्थागत विकासको मूल्याङ्कन गरी दक्षता, सुशासन र सेवा सुधारका लागि पुनर्संरचना सिफारिस गर्नेछ।

सीईओ बद्रीकुमार गुरागाईंका अनुसार, बदलिँदो नियामकीय व्यवस्था, उच्च तरलता र सीमित व्यावसायिक अवसरलाई सम्बोधन गर्न संगठन तथा व्यवस्थापन अध्ययन अपरिहार्य भएकाले यस्तो पहल गरिएको हो।

इच्छुक परामर्शदाता वा कम्पनीले प्राविधिक र वित्तीय प्रस्ताव छुट्टाछुट्टै पेश गर्नुपर्ने र प्रस्ताव बुझाउने अन्तिम मिति सूचना प्रकाशित भएको १५ दिनभित्र तोकिएको बैंकले जनाएको छ।