कर्जा असुली न्यायाधिकरणका अध्यक्ष कृतिबहादुर बस्नेतले सहकारी ऐन र नियमावलीले दिएको क्षेत्राधिकारलाई प्रयोग गरी काम अगाडि बढाउने बताएका छन् । उनले पद तथा गोपनीयताको सपथ ग्रहणसँगै आज पदबहाली पछि पत्रकारहरु संक्षिप्त कुराकानी गर्दै ऐन नियमले दिएको क्षेत्राधिकारलाई टेकेर काम गर्ने बताएका हुन् ।
अध्यक्ष बस्नेतले सहकारी संघ संस्थाबाट नै उजुरी आउने र त्यस्ता उजुरीलाई छिनोफानोको लागि प्रतिवादीलाई म्याद दिने र म्यादभित्र प्रतिउत्तर आउने बताए । अहिले सहकारी क्षेत्रमा विकराल अवस्था रहेको र सहकारीले उठाउन नसकेको ऋण उठाउनलाई न्यायाधिकरणको भूमिका रहने बताए । सहकारी संघ संस्थाले ऋण असुलीको लागि सक्दो प्रयास गर्दा पनि असुली हुन नसकेको ऋण उठाउन सघाउने उनको भनाई छ । ‘न्यायाधिकरणमा संघ संस्थाबाट उजुरी आउँछ , न्याय सम्पादन मात्रै नभई ऋण असुली अधिकृतले गर्ने काम समेत यहाँबाट गरिने छ’ उनले भने । न्याायाधिकरण स्थापनाको चरणमा नै भएकाले कार्यालयले छिट्टै आफ्नो काम अगाडि बढाउने उनले जानकारी दिए । अहिले देशभरका जिल्ला अदालतहरुमा सहकारीका कर्जासँग सम्बन्धित मुद्दाहरु रहेको र न्यायाधिकरणको क्षेत्राधिकार देशभर भएकाले ती मुद्दाहरु पनि यस कार्यालयमा आउन सक्ने उनले बताए । सुरुमा मुद्दाको चाप धेरै बढ्ने सम्भावना रहेको र काम गर्दै जाँदा सफल हुने उनको भनाई छ ।
आवश्यक कार्यविधिहरु बनाएर कामलाई अगाडि बढाउने उनको भनाई छ । अहिले बचत गर्नेले समयमा बचत फिर्ता नपाइराखेको र लगानी गरेको ऋण पनि समय असुली नभइरहेको विकराल स्थितिबाट सहकारी क्षेत्रलाई पार लगाउनु न्यायाधिकरणको मुख्य काम भएको अध्यक्ष बस्नेतले बताए । स्थानीय, प्रदेश र संघीय मातहत रहेका सहकारी संस्थाको मुद्दा हेर्ने गरी न्यायाधिकरण स्थापना भएको छ । बैंक तथा वित्तीय संस्थाको केन्द्रमा पनि छुट्टा छुट्टै कार्यालय रहेको भए पनि सहकारी लागि पहिलो न्यायाधिकरण भएकोले त्यो सम्भव नभएको उनको भनाई छ । सहकारी संस्थाले लिएको धितो खोजीदेखि मुल्याङ्कन गर्नको लागि फिल्डसम्म जानुपर्ने भन्दै उनले ऋण असुली अधिकारी माफर्त उक्त कार्यलाई अगाडि बढाइने उनको भनाई छ ।
