नेपाल राष्ट्र बैंकले प्रकाशित गरेको सुदूर पश्चिम प्रदेशको अर्धवार्षिक गतिविधि अध्ययन प्रतिवेदन अनुसार सो प्रदेशका सहकारीमा ४२ प्रतिशतसम्म पुँजी वृद्धि भएको छ ।  प्रदेशमा रहेका सहकारीहरुमध्ये नमुनाको रुपमा छनौट गरिएका १० वटा सहकारीहरुको विस्तृत रुपमा अध्ययन गर्दा पुँजी वृद्धि देखिएको जनाइएको छ । 

समीक्षा अवधिमा नमुना छनौटमा परेका १० वटा सहकारीहरुले संकलन गरेको कुल पुँजी गत वर्षको सोही अवधिको तुलनामा ४२.९२ प्रतिशतले वृद्धि भई रु.१ अर्ब १ करोड १९ लाख पुगेको छ । गत वर्षको समीक्षा अवधिमा यस्तो पुँजी ४.७६ प्रतिशतले वृद्धि भई रु.७० करोड ८० लाख पुगेको थियो । यसैगरी, कुल बचत गत वर्षको समीक्षा अवधिको तुलनामा ९.८३ प्रतिशतले बढ्न गई रु.५ अर्ब ७५ करोड ७५ लाख पुगेको छ । गत वर्षको समीक्षा अवधिमा यस्तो बचत ११.०३ प्रतिशतले बढ्न गई रु.५ अर्ब २४ करोड २१ लाख पुगेको थियो । 
 
त्यसैगरी समीक्षा अवधिमा नमुना छनौटमा परेका १० वटा सहकारीहरुले प्रवाह गरेको कुल ऋण गत वर्षको समीक्षा अवधिको तुलनामा ५.५९ प्रतिशतले वृद्धि भई रु.४ अर्ब ८५ करोड ८४ लाख पुगेको छ । गत वर्ष सोही अवधिमा यस्तो ऋण ३.४६ प्रतिशतले वृद्धि भई ४ अर्ब ६० करोड १२ लाख पुगेको थियो ।

समीक्षा अवधिमा छनौट गरिएका सहकारी संस्थाका सदस्यहरुको संख्या ७.३६ प्रतिशत र सहकारी संस्थामा काम गर्ने कर्मचारीको संख्या ३.९३ प्रतिशतले वृद्धि भएको छ । अघिल्लो आर्थिक वर्ष २०८०÷८१ को पुस मसान्तमा सदस्य संख्या ७.१४ प्रतिशतले वृद्धि भएको थियो भने कर्मचारी संख्या ४.७१ प्रतिशतले घटेको थियो ।