बजारमा तरलता प्रवाह बढाउन नेपाल राष्ट्र बैंकले आज २० अर्बको १४ दिन अवधिको रिपो जारी गर्ने भएको छ । बैंकले यही कात्तिक २५ गते परिपक्व हुने रिपो बोलकबोल माध्यमबाट बैंकिङ प्रणालीमा प्रवाह गर्न लागेको हो ।
विगत केहि महिनादेखि बैंकिङ क्षेत्रले निरन्तर तरलता अभाव भोगिरहेको छ । तरलता व्यवस्थापन गर्न राष्ट्र बैंकले केही समय अघिदेखि निरन्तर गर्न रिपो जारी गर्दै आएको छ । बोलकबोलमा इजाजतप्राप्त क, ख र ग वर्गका स्वीकृतप्राप्त बैंक वित्तीय संस्थाले भाग लिन पाउने बैंकले जनाएको छ ।
कात्तिक ३ गते पनि बैंकले १० अर्व बराबरको ७ दिन अवधिको रिपो जारी गरेको थियो ।
तरलता अभाव भएपछि बैंकहरुले निक्षेपमा ब्याजदर बढाएको भएतापनि आवश्यक मात्रमा निक्षेप बढ्न सकेको छैन । ब्याजदर बढाउन प्रतिस्पर्धामा बैंक तथा वित्तीय संस्था लागेपछि राष्ट्र बैंकले तीन बुँदे निर्देशन नै जारी गर्यो । एक पटकमा एक महिना भित्र १० प्रतिशतले मात्र ब्याजदर वृद्धि गर्न पाउने निर्देशन राष्ट्र बैंकको छ । हाल अधिकांश बैंकले निक्षेपमा अधिकतम नौ दशमलव ३६ प्रतिशत व्याज दिँदै आएका छन् ।
