नेपाल बचत तथा ऋण केन्द्रीय सहकारी संघ(नेफ्स्कून)ले राष्ट्रिय सहकारी नियमन प्राधिकरणले हालै जारी गरेको निर्देशन तथा मापदण्डप्रति आपति जनाएको छ । नेफ्स्कूनले एक विज्ञप्ति जारी गर्दै प्राधिकरणले बचत तथा ऋणको मुख्य कारोबार गर्ने सहकारी संस्थाको कारोबारलाई व्यवस्थित, पारदर्शी र प्रभावकारी बनाउन जारी गरेको मापदण्डका कतिपय विषयमा गम्भिर ध्यानाकर्षण भएको जनाएको हो ।

बचत ऋण सहकारीको विश्वव्यापी मूल्य, मान्यता,सिद्धान्त र अन्तर्राष्ट्रिय अभ्यासको प्रतिकुल हुने सहकारी प्राधिकरणले निर्देशन तथा मापदण्ड जाारी गरेको नेफ्स्कूनका अध्यक्ष चन्द्र प्रसाद ढकालद्वारा जारी विज्ञप्तिमा उल्लेख छ । बचत ऋण सहकारी अभियानको संघहरुमा प्रारम्भिक सहकारी संस्थाहरुले राखेको तरलतालाई निर्देशन तथा मादण्ड मार्फत गणनालाई समयसीमा तोकी गणना हुने व्यवस्था गर्नु गलत भएको नेफ्स्कूनको ठहर छ ।

प्रारम्भिक संस्थाहरुको वृद्धि र विकासलाई संकुचन हुने गरी जारी गरेको मापदण्डहरुले समग्र अभियानलाई धरासायी बनाउने उनको भनाई छ । बचत तथा ऋण सहकारीले आफ्नो तरलता एवम् बचत ऋणको कारोबार आफ्नै संघहरु मार्फत् परिचालन गर्ने पद्धतीलाई कमजोर बनाई सहकारको पूँजी विचलित गराउने कार्यको प्रयास गरेको ठहर नेफ्स्कूनको  छ । यसर्थ सहकारी ऐन २०७४ र नियमावली ७५ का व्यवस्था मार्फत् संघ संस्थाहरुलाई प्रद्वत अधिकार कुण्ठित हुने गरी जारी भएको मपदण्ड तत्काल परिमार्जन गर्न नेफ्स्कूनले माग गरेको छ ।

केन्द्रीय संघले बचत तथा ऋण सहकारी अभियानलाई भद्र अवज्ञा गरी दवाव सृजना गर्न सार्वजनिक आव्हान गरेको छ भने सम्पूर्ण संघहरुलाई विचलित नभई अभियानमा ऐक्यवद्धता कायम गर्दै नियमित कारोबारलाई सुचारु गर्न अनुरोध गरेको छ । समग्र बचत ऋण सहकारी अभियानको साझा धारणाका  साथ आगामी कार्यक्रमहरु सार्वजनिक गरिने विज्ञप्ति मार्फत नेफ्स्कूनले जनाएको छ ।