राष्ट्रिय सहकारी महासंघकी अध्यक्ष ओमदेवी मल्लले ऐन नियमको पूर्ण पालना नगर्दा सहकारी क्षेत्रमा समस्या आएको बताएकी छिन् । राजधानीमा बुधबार भएको एक कार्यक्रममा बोल्दै उनले सहकारीका सात सिद्धान्त र १० वटा मूल्य, मान्यतालाई पालना गरेर अगाडि बढेका सहकारी संस्थामा समस्या नआएको उल्लेख गरिन् । ‘सरकारले जारी गरेको ऐन कनुनलाई कि त मान्दिन भन्नु पर्यो कि त पालना गरेर जानुपर्यो’, उनले भनिन्, ‘सहकारीको ऐन नियमका साथै मूल्य, मान्यता र सिद्धान्तलाई आत्मसात गरेर अगाडि बढ्नुपर्छ ।’ 

सहकारी ऐन २०७४ मा भएका व्यवस्था कार्यान्वयन गर्न नसक्दा पनि यो क्षेत्रमा समस्या बढेको उनले जनाइन् । कर्जा कूचना केन्द्र, ऋण असुली न्यायाधिकरण, बचत तथा कर्जा सुरक्षण कोष जस्ता व्यवस्था तत्काल लागु गनुपर्ने उनको माग छ । सहकारीमा सुशासन कायम गर्न आवश्यक रहेको र त्यसका लागि सरकारले संरचनागत व्यवस्था गर्नुपर्ने उनको माग छ ।  सहकारी संस्था र संघको भूमिका के हो भन्नेमा क्लियर हुन आवश्यक रहेको भन्दै उनले संघ र संस्थाले एउटै काम गर्ने होइन होला नि ! भनेर प्रश्न गरिन् । जिल्ला, प्रदेश, केन्द्रीय संघ र सहकारी महासंघको काम के हुने भनेर प्रष्ट गर्ने बेला आएको अध्यक्ष मल्लले बताइन् । कर्तव्य के हो भन्ने  बुझिएन भने संघहरुको भविष्य अन्यौल हुने उनले प्रष्ट पारिन् । 

सहकारीमा शेयर खरिद नगरीकन सदस्य नभइने र सदस्य नबनी कारोबार गर्न नपाइने भए निर्देशन र मापदण्डमा त्यो विषय फरक ढंगले आएकाले त्यसलाई संशोधन गर्न उनले ध्यानाकर्षण गराइन् । बचत तथा सहकारी भनेर साइनबोर्ड राखेका मात्रै प्राधिकरणमा रजिष्ट्रशेन हुुनु पर्ने हो कि बचतऋणको कारोबार गर्ने सबै प्रकृतिका संस्था भन्नेमा अन्यौल रहेकाले त्यस विषयमा प्रष्ट पार्न उनले आग्रह गरिन् ।