सिको बचत तथा ऋण सहकारी संस्था लिले लुम्बिनी प्रदेश सरकारबाट उत्कृष्ट सहकारी पुरस्कार २०८१ प्राप्त गरेको छ । ६८औँ राष्ट्रिय सहकारी दिवसको अवसरमा लुम्बिनी प्रदेश कृषि, भूमि व्यवस्था तथा सहकारी मन्त्रालयले आयोजना गरेको कार्यक्रममा सिको साकोस यस वर्षको ‘उत्कृष्ट सहकारी’ पुरस्कार प्राप्त गर्न सफल भएको हो ।

नेफ्स्कूनको स्तरीकरण कार्यक्रममा आबद्ध रहेको ठाकुरबाबार नगरपालिका १, भुरिगाउँ बर्दियामा सञ्चालनमा रहेको सिको साकोसको कार्यसम्पादन र स्थलगत मुल्यांकनका आधारमा विभिन्न सूचकहरुमा गरिएको परीक्षणबाट साकोस उत्कृष्ट भएको साकोसको प्रतिनिधित्व गर्दै नेफ्स्कूनको बरिष्ठ उपाध्यक्ष तथा साकोसका अध्यक्ष दामोदर अधिकारीले जानकारी दिए । बचत तथा ऋणको माध्यमबाट वित्तीय सेवा प्रवाह गरी सहकारी व्यवसाय मार्फत सदस्यहरुको आर्थिक, सामाजिक र सांस्कृतिक विकासमा उल्लेख्य योगदान पुर्याए वापत प्रदेश सरकारको नियमन क्षेत्राधिकार भित्र रहेका सहकारी संस्था मध्ये बचत तथा ऋणको सेवा तर्फबाट सिको साकोसलाई उत्कृष्ट सहकारी पुरस्कार प्रदान गरिएको सम्मानपत्रमा उल्लेख छ । 

कार्यक्रममा लुम्बिनी प्रदेशका मुख्य मन्त्री चेतनारायण आचार्यले समाजिक सेवाको व्यवसाय मार्फत सदस्यहरुको आर्थिक, सामाजिक जीवनस्तर सुधारमा लागेको सहकारी क्षेत्रमा बाहिरबाट गलत र छद्मभेषी व्यक्तिहरु प्रवेश गरेर सहकारीको बदनाम गराउने र सहकारीको बचतको दुरुपयोग समेत गर्ने गरेको पाइएको बताए ।  कृषि भूमि ब्यवस्था तथा सहकारी मन्त्री दिनेश पन्थीले सहकारीलाई प्रदेश सरकारले कार्यसम्पादन मूल्यांकनले असल सहकारी र कमसल सहकारीको वर्गिकरण गर्न सकिने र कमसललाई सच्याउन अवसर मिल्ने बताए । 

साकोसका अध्यक्ष एवं नेफ्स्कूनका बरिष्ठ उपाध्यक्ष अधिकारीले प्रदेश सरकारले सहकारीहरुको कार्यसम्पादन स्तरलाई मुख्य आधार बनाएर अनुगमन अगाडि बढाएको विषय प्रशंसायोग्य रहेको जनाए । नियतवश ऋण नतिरी भाखा नघाएर बस्ने सदस्यहरुलाई सरकार मातहत प्रदान गरिने सेवा सुविधामा कटौति गरेर ऋण असुली सहजताका लागि समन्वय गरिदिन समेत सरकारलाई उनले अनुरोध गरेका थिए । 

लुम्बिनी प्रदेश मातहत ८ सय ४८ सहकारी छन् । प्रदेशले सहकारीमा वित्तीय व्यवस्थापन, सदस्य केन्द्रीयता, सुशासन, कार्यसम्पादन स्तर, आन्तरिक व्यवसायिक प्रक्रिया, सिकाई र बृद्धि लगायत विविध ८० वटा सूचकका आधारमा बचत तथा ऋण सहकारीको स्थलगत अनुगमन शुरु गरेको छ । जस अन्तर्गत बचत तथा ऋण सहकारी मध्येबाट दुई सहकारी र अन्यबाट दुई सहकारी गरि ४ वटा सहकारीलाई पुरस्कृत गरेको हो ।