कुटुम्ब बचत तथा ऋण सहकारी संस्थाको १३ औं साधारण सभा सम्पन्न भएको छ । संस्थाका अध्यक्ष सुदिप कुुमार खनालको अध्यक्षता एवं काठमाडौं बचत तथा ऋण सहकारी संघ (कास्कून) का अध्यक्ष दिपक पनेरुको प्रमुख आतिथ्यतामा सभा सम्पन्न भएको हो । 

सभामा बोल्दै अध्यक्ष पनेरुले सहकारी र बैंकको बीचमा धेरै फरक भएको भन्दै बैंक नाफामुखी भएको र सहकारीले सदस्यको हरेक क्षेत्रमा जोडिएर सेवा दिने गरेको बताए । सहकारी अभियानले वृहत उदेश्य बोकेको भए पनि त्यसको महत्वलाई आम सदस्य माझ बुझाउन नसक्दा सहकारीप्रति गलत धारणा विकास भएको उनको भनाई छ । देशभर करिब ६ सय  सहकारी संस्था मात्रै समस्यामा परेको भन्दै उनले बाँकी सहकारीले उदेश्य अनुसार काम गर्दै अगाडि बढेकोे दावी गरे । 

सहकारीले समाजमा धेरै योगदान गरेको भए पनि त्यसको प्रचारप्रसारमा कमी भएको उनले बताए । घर परिवार र आफन्तले विश्वास नगरेको अवस्थामा पनि सहकारीले विश्वास गरेर ऋण सुविधा दिएको गुणलाई बिर्सेर हल्लाको पछि मात्र नलाग्न उनले सदस्यहरुलाई आग्रह गरे । सहकारीमा सबैले बचत झिकेर बैंक र फाइनान्समा लगेपछि सञ्चालक र व्यवस्थापकले चाहेर मात्र संस्था नटिक्ने उनले प्रष्ट पारे । संस्थामा गलत हुन आँटेको छ भने खबरदारी गर्नुपर्छ तर खबरदारीसँगसँगै जिम्मेवारी पुरा गर्न सदस्यहरु पनि लाग्नुपर्ने उनले बताए । 

सदस्यहरुले मासिक बचत नगर्ने र लगेको ऋणको साँवा ब्याज समय नतिर्दा समस्या आउने भएकाले सदस्यहरुलाई आफ्नो जिम्मेवारी पुरा गर्न उनले सुझाए । सहकारीमा ७० लाख मानिस आवद्ध भएको भन्दै पनेरुले राजनीतिक र धार्मिक संघ संस्थामा  पनि यति ठुलो जनसंख्या नजोडिएकाले यो क्षेत्रलाई बलियो बनाउनुको विकल्प नरहेको बताए ।  एउटा सहकारीमा समस्या आउँदा त्यसको प्रभाव सिंगो अभियानमा पर्ने भएकाले सहकारी संस्थालाई सुरक्षित र बलियो बनाएर लैजानुपर्ने अध्यक्ष पनेरुको भनाई छ ।

सभामा अध्यक्ष खनालले प्रतिवेदन प्रस्तुत गर्दै सहकारी सिद्धान्त अनुसार संस्था सञ्चालन भइ वित्तीय पहुँचबाट टाढा रहेका सदस्यहरुलाई एकिकृत गरी सेवा प्रदान गर्दै आएको बताए । समाजमा छरिएर रहेको ससानो पुँजीलाई बचतको माध्यमबाट एकीकृत गरी सदस्यहरुको वित्तीय आवश्यकता परिपूर्तिको साथै आर्थिक सामाजिक तथा साँस्कृतिक रुपान्तरणका लागि समुदायको भरपर्दो माध्यमका रुपमा संस्थाले काम गर्दै आएको उनले जनाए । 

संस्थाले सदस्यहरुलाई सहकारी शिक्षा तथा तालिम प्रदान गरी सहकारीका बारेमा सचेतना जगाउनुकासाथै सामाजिक उत्तरदायित्व बहन समेत गर्दै आएको खनालको भनाई छ । सदस्यहरुको माग र आवश्यकता अनुसार संस्थाले विभिन्न क्षेत्रमा ऋण प्रवाह गर्दै आएको उनले जानकारी दिए । 

सभामा कोषाध्यक्ष कृष्णप्रसाद गौतमले आर्थिक वर्ष २०८०/८१ को आर्थिक प्रतिवेदन प्रस्तुत गर्दै आर्थिक मन्दीका बीचमा पनि संस्थाको समग्र सूचांकहरुमा सुधार भएको उल्लेख गरे । संस्थाले गत असार मसान्तसम्म शेयर पुँजी ६.२५ प्रतिशतले वृद्धि गरी १ करोड ६१ लाख ८३ हजार, बचत संकलन २७.६५ प्रतिशतले वृद्धि गरी ५ करोड ७० लाख ८७ हजार र ऋण लगानीमा ५ प्रतिशतले वृद्धि गरी ५ करोड ४६ लाख २४ हजार पु¥याएको सभामा उनले जानकारी दिए । संस्थाको जगेडा कोषमा ५४ लाख ४० हजार र अन्य कोषहरुमा १२ लाख १७ हजार रहेको छ । संस्थाले त्यस अवधिमा १० लाख ९१ हजार खुद बचत गर्न सफल भएको छ । संस्थाको कुल वासलात ८ करोड ४१ लाख ९१ हजार पुगेको छ ।