ललितपुर जिल्ला बचत तथा ऋण सहकारी संस्थाको आयोजनामा ‘सहकारी बहस’ कार्यक्रमको सम्पन्न भएको छ । संघले ३१ औं स्थापना दिवसको अवसरका सहकारी क्षेत्रमा देखिएको समस्या र समाधानको उपाय खोज्ने उदेश्यका साथ सहकारी बहस कार्यक्रम आयोजना गरेको हो ।

जिल्लाको सहकारी अभियानलाई सबल  र सक्षम बनाउन समय समयमा विविध रचनात्मक कार्यक्रम गर्दै आएको संघले पछिल्लो समय सहकारी क्षेत्रमा समस्या बढेर गएपछि समस्या समाधानमा कसको भूमिका के हुने भनेर पहिल्याउन यो कार्यक्रम आयोजना गरेको जनाएको छ ।

संघका अध्यक्ष रामहरी बजगाई अध्यक्षतामा भएको बहस कार्यक्रममा सहकारी विभागका रजिष्ट्रार पिताम्बर घिमिरे उप–रजिष्ट्रार टोलराज उपाध्याय, बागमती प्रदेश सहकारी रजिष्ट्रार राजन पोखरेल, राष्ट्रिय सहकारी महासंघकी अध्यक्ष ओमदेवी मल्ल र नेपाल बचत तथा ऋण केन्द्रीय सहकारी संघ(नेफ्स्कून) का अध्यक्ष चन्द्र ढकालले सहभागीहरुका प्रश्नको जवाफ दिएका थिए । 

बहस कार्यक्रममा रजिष्ट्रार घिमिरेले सहकारीको मूल्यमान्यता र सिद्धान्तलाई आत्मसात गर्दै समुदाय र सदस्य केन्द्रीत भएर संस्था सञ्चालन गरे समस्या नआउने बताए । सहकारी स्वःनियमन र स्वःअनुशासनमा सञ्चालन हुने संस्था भएकाले सरकारले अन्य क्षेत्रमा जस्तो हस्तक्षेपकारी नियमन नगरेको उनको भनाई छ ।

नियम कानुन र सिद्धान्तविपरित संस्था सञ्चालन गरी सदस्यको बचत दुरुपयोग गर भनेर सरकारले संस्था दर्ता नगरेको उनले प्रष्ट पारे । सहकारी ऐन नियममा भएको व्यवस्था अनुसार नै संस्थाहरुको कार्यक्षेत्र विस्तार र सेवा केन्द्र स्वीकृत दिएको भन्दै घिमिरेले त्यसको आवश्यकता र औचित्यका विषयमा अध्ययन नहुनु भने कमजोरी भएको स्वीकार गरे । 

सहकारी ऐननियम र विधिमा चलेका सहकारी संस्था राम्रो रहेको भन्दै उनले सदस्यको बचत दुरुपयोग गर्ने छुट कसैलाई पनि नभएको बताए । गलत गर्ने संस्थालाई कानुन अनुसार कारवाही गरी जनताको बचत फिर्ता गराउन सरकार लागिराखेको सो अवसरमा उनले जनाए । सहकारी ऐनमा भएका कतिपय व्यवस्था तत्काल लागू गर्न सरकार लागि परेको जानकारी दिँदै घिमिरेले त्यसका लागि आवश्यक ऐन कानुनको मस्यौदा तयार भइसकेको बताए । 

बागमती प्रदेश सहकारी  रजिष्ट्रार राजन पोखरेलले बागमती प्रदेशमा रहेको सहकारी संस्थाको नियमन तथा प्रवद्र्धनमा आफुहरु लागिरहेको बताए । सहकारी संस्थाले दिएको प्रतिवेदन र अन्य कागजातलाई अभिलेख राख्नेका साथै सदस्यको बचत फिर्ता गर्न नसकेका सहकारी संस्थाका सञ्चालक र सदस्यहरुबीच छलफल गरेर समस्या समाधानको लागि निरन्तर कार्य गर्दै आएको उनले जानकारी दिए । 

राष्ट्रिय सहकारी महासंघकी अध्यक्ष ओमदेवी मल्लले अन्य ४६ वटा कानुनले सहकारी संस्थाहरुलाई उत्पादन र बजारीकरणमा जान रोक लगाएर बचत तथा कारोबारमा सीमित हुन परेको बताइन् । छिटोछिटो सरकार र कर्मचारी परिर्वतन भई रहँदा सहकारीको  समस्या समाधान गर्न र ऐन कार्यान्वयन गर्न समस्या भएको उनको भनाई छ । सहकारी ऐनमा व्यवस्था भएको कर्जा सुचना केन्द्र, ऋण असुली न्यायाधिकरण, बचत तथा कर्जा सुरक्षण कोष समयमा ल्याउन सकेको भए सहकारी क्षेत्रमा यति ठुलो समस्या नआउने उनको जिकिर थियो । सहकारीका समस्या समाधान गर्न महासंघले सरकारसँग निरन्तर लविइङ गर्दै आएको जानकारी दिँदै उनले छिटै नीतिगत बहस चलाउने जनाइन् । 

नेफ्स्कूनका अध्यक्ष चन्द्र ढकालले पोलिसी बनाउने र लागू गर्ने काम सरकारको भएको बताए । सहकारी ऐनमा व्यवस्था भएका कतिपय कुरा कार्यान्वयनमा आउन ढिलाई हुँदा पनि सहकारीम समस्या बढेको उनको भनाई छ । ऐनका व्यवस्थाहरु तत्काल लागू हुनेका आफु आशावादी रहेको भन्दै ढकालले सहकारी अभियानको समस्या समाधान हुने जनाए । 

ललितपुर जिल्ला बचत संघका अध्यक्ष बजगाईले संघको समग्र वित्तीय विवरणको जानकारी दिँदै संघले जिल्लाको सहकारी अभियानलाई सबल र गतिशील बनाउन विभिन्न तालिम तथा गोष्ठी गर्दै आएको बताए । संघको आफ्नै  भवन निर्माणका लागि जग्गा खरिद गरी प्रक्रिया अगाडि बढाएको र सदस्य संस्थालाई शुल्क र निःशुल्क तालिम समेत प्रदान गर्दै आएको अध्यक्ष बजगाईले बताए । संघले २४ वटा कार्यविधि निर्माण गरेको र कार्यविधिका आधारमा संघ सञ्चालन गर्दै आएको उनले  जनाए । 

संघमा आवद्ध संस्था मधये ४२ संस्था समस्याउन्मूख रहेको र समस्या समाधान गर्न संघले सहजीकरण गर्दै आएको छ । संघमा आवद्ध रहेका ५२१ संस्था मध्ये निस्कृय संस्थाको संख्या ४० रहेका र ती संस्थाको सदस्यता खारेज गरिएको जानकारी दिइयो । ५ बर्षे रणनीति योजना तयार गरेको र ९८ प्रतिशत योजना पुरा गर्न सफल भएको उनको भनाई छ । संघले जिल्लामा रहेका स्थानीय तहसँग सहकार्य गरेर सहकारी अभियानलाई सबल बनाउन लागिरहेको उनको भनाई छ । 

कार्यक्रममा जिल्लामा रहेका सहकारी संस्थाका प्रतिनिधिहरूको उल्लेख्य सहभागिता रहेको थियो ।