नेपाल बीमक संघले कोरोना बीमा रकम भुक्तानी  माग गर्दै सर्वोच्च अदालतमा रिट दायर भएको छ । लामो समय वित्दा समेत कोरोना बीमाको रकम नपाएपछि संघले सर्वोच्चमा रिट दायर गरेको हो । संघले सरकारले तिर्नुपर्ने रकम तत्काल निकासा गर्न माग गर्दै  आज  रिट दायर गरेको हो ।

सरकारले यसअघि बीमक संघसँग गरेको सहमतिअनुसार कोरोना बीमा रकम भुक्तानी नगरेको भन्दै संघले सो रकम भुक्तानी गराइ पाउँ भन्दै अन्तरिम आदेश माग गरेको छ । बीमा कम्पनीहरुले कोरोना बीमाको करिब ११ अर्ब रुपैयाँ भुक्तानी गर्न बाँकी छ । सरकारसँग भएको सम्झौता र कोरोना बीमा मापदण्ड अनुसार उक्त दायित्व सरकारले ब्यहोर्नुपर्ने भए पनि भुक्तानी नभएको भन्दै सरकारविरुद्ध रिट दायर गरिएको संघले जनाएको छ । 

कोरोना  बेला साढे तीन अर्ब भन्दा बढी दायित्व सृजना भएमा सरकारले ब्यहोर्ने प्रतिवद्धता गरेपछि बीमा कम्पनीहरुले कोरोना बीमा पोलिसी बेच्न सुरु गरेका थिए । तर, लामो समयदेखि सरकारले व्यहोर्नुपर्ने कोरोना बीमाको दायित्व नपाएपछि बीमा कम्पनीहरु सर्वोच्च अदालत गएका हुन् । उक्त रिटमाथि सर्वोच्च अदालतले सोमबार बिहान १० बजे पेशी तोकेको छ । यसका साथै दुवै पक्षलाई भोली अदालतमा उपस्थित हुन भनिएको छ ।