राष्ट्रिय सहकारी महासंघकी अध्यक्ष ओमदेवी मल्लले सहकारी संस्थालाई उत्पादनमा जानको लागि सरकारले सहुलियत ऋण दिनुपर्ने बताएकी छिन् । महासंघले आयोजना गरेको पहिलो रोजगार दाता मेलामा बोल्दै मल्लले राष्ट्रिय सहकारी बैंक मार्फत सहुलियत कर्जा दिन माग गरिन् ।
सहकारीले बचत तथा ऋणको मात्र कारोबार नगरेको भन्दै उनले उत्पादन र सेवाको क्षेत्रमा पनि काम गर्दै आएको बताइन् । सहकारी संस्थाबाट १४/१५ प्रतिशत ब्याज दरमा ऋण लिएर व्यवसाय गर्न नसक्ने भन्दै सरकारले सहुलियत कर्जा उपलब्ध गराउन उनले माग गरिन् । महँगोमा ऋण लिएर उद्योग व्यवसाय गर्न सम्भव नभएको भन्दै सरकारले सहुलियत ऋण उपलब्ध गराउनु पर्नेमा उनको जोड छ । सहकारीले उत्पादन गरेका वस्तुको विक्री गर्न उत्पत्तिको प्रमाणपत्र नपाएको भन्दै उनले निजी कम्पनी मार्फत वस्तु विक्री गर्नु परेको गुनासो गरिन् । सहकारी मार्फत पाँच सय साना तथा मझौला उद्योग सञ्चालन हुँदै आएको मल्लले जानकारी दिइन् । सहकारीले चिया, कफी जस्ता वस्तुको उत्पादन गर्दै आएको र पूर्वी नेपालमा चक्लाबन्दी खेती समेत सुरु भएको उनको भनाई छ । सहकारी क्षेत्रले पनि अन्य क्षेत्र सरह नै उपदान, सामाजिक सुरक्षा कोष र सुरक्षा भत्ताको व्यवस्था मिलाएको भन्दै मल्लले अन्य निकायको तुलनामा सहकारीमा सेवा सुविधा कम नभएको उल्लेख गरिन् ।
नेपालमा श्रम सहकारी दर्ता गरेको भए पनि सरकारको सहयोगको अभावले बन्द हुने अवस्था पुगेको उनले बताइन् । प्रहरीसँगको सहकार्यमा जेलमा रहेका बन्दीहरुलाई सिप विकास गरी रोजगारी सृजना गर्न आफुले पहल गर्ने मल्लले जानकारी दिइन् । सहकारी क्षेत्रमा पनि अवसर छ र रोजगारीको लागि विदेश जाने युवाशक्तिलाई स्वदेशमा नैे केही गर्न सकिन्छ भन्ने सन्देश मेलाले दिने उनको भनाई छ ।
