भक्तपुर बचत संघको आयोजनामा महिला नेतृत्व तथा उद्यमशीलता उत्पे्ररणा तालिम सम्पन्न भएको छ । संघ लि. को महिला सशक्तिकरण उपसमितिको आयोजनामा एक दिने महिला नेतृत्व तथा उद्यमशीलता उत्प्रेरणा तालिम भएको हो ।
संघका अध्यक्ष कृष्ण गोविन्द लाखाजुले सिलाई कटाई, बुनाई, व्यटिसियन जस्ता सिपमूलक तालिममा मात्र सीमित रहेर अहिलेको प्रतिस्पर्धात्मक समयमा महिलाहरु अगाडि बढ्न नसक्ने हुँदा क्षमता अभिवृद्धिका तालिमहरु पनि आवश्यक रहेको जनाए ।
सहकारीमा महिला सदस्य र महिला कर्मचारी तुलनात्मक रुपमा पुरुषको भन्दा बढी सहभागिता रहेता पनि पुरुष नेतृत्वकै हावी भइरहेको अवस्थालाई चिर्न पनि महिला नेतृत्वको आवश्यक रहेको उनले बताए । सहकारीको समस्या समाधान गर्न हाल राज्यले नयाँ सहकारी दर्ता बन्द गरेको र प्रभावकारी नियमन गर्त दोस्रो तहको नियामक निकाय गठनमा लागेको उनले बताउनुभयो ।
संघका सचालक एवं उपसमितिका संयोजक कृष्णश्वरी मचामसीले महिला दिदीबहिनीहरु आफ्नो खुट्टामा आफै उभिन सक्नुपर्ने विचार भन्दै महिलाहरुलाई नेतृत्व र उद्यममा प्रेरित गर्न तालिमको आयोजना गरेको जनाइन् ।
मेटिभेसनल स्पिकर डा तारा प्रसाद गिरीले हामी सँग जे छ त्यसमा सन्तुष्ट हुनुपर्ने र सानो सानो कुराहरुमा ध्यान दिनुपर्ने कुरा बताए । समाज बदलिन आफुलाई आफैले माया गर्नुपर्ने र आफुले आफूलाई नै पहिला बदल्नुपर्ने उल्लेख गरे । पुरानो सोच हटाई नयाँ सोचमा ल्याउन सिकाईलाई निरन्तरता दिनुपर्ने उनले जनाए ।
सहजकर्ता सुन्दर श्याम घिमिरेले सिप विकास तालिम र उद्यमशीलता तालिम बिच भिन्नता रहेको बताउँदै उद्योगको महत्व, जोखिम र समस्याहरुबारेमा जानकारी दिए । सिप सिकेका सबै उद्यमी बन्न नसक्ने भएकोले उद्यमशीलताको तालिम समेत आवश्यक रहेको उनले उल्लेख गरे ।
महिला सशक्तिकरण उपसमिति सदस्य सूवर्ण प्रभा गुरागाइले धन्यवाद मन्तव्य दिँदै अन्य तालिमहरूमा महिलाहरूलाई जोड दिइने बताइन् । साथै आफु भित्र लुकेको प्रतिभालाई उजागर गर्न यस उत्प्रेरणात्मक तालिमले सहयोग गर्ने उनको भनाई थियो । उपसमितिका सदस्य निर्जला ढुगेंलले सञ्चालन गरेको सो तालिममा ४४ जनाको सहभागिता रहेको थियो ।
