सहकारी क्षेत्रमा वर्तमान समयमा जे जस्ता समस्याहरु देखा परेका छन्, त्यसका लागि अभियानले साझा धारणा दिनुपर्छ र साकोस अभियानमा ऐक्यवद्धता कायम गर्दै आगामी दिनमा कसरी अगाडि बढ्ने भन्ने कार्यदिशा तय गरेर अगाडि बढ्नका लागि बागमती प्रदेश स्तरीय साकोस समिट गर्न लागेका हौं । यसलाई सफल बनाउन बागमती प्रदेश भित्रका १३ वटै जिल्ला बचत संघहरुलाई सह–आयोजक बनाएका छौं । संघमा आवद्ध ५ सय संस्थामध्ये २५० संस्थाका प्रतिनिधिहरु समिटमा सहभागी गराउँछौं । समिटमा सहभागि हुन धेरै संस्थाका प्रतिनिधिहरुले नाम दर्ता गरिराख्नुभएको छ । समिटप्रति चासो बढेर गएको छ । विषयवस्तुहरुलाई पनि समसामयिक बनाएका छौं । विज्ञहरुबाट कार्यपत्र प्रस्तुत हुन्छ भने टिप्पणीकर्ताले पनि विषयवस्तुमा रहेर आफ्नो धारणा राख्नुहुनेछ। सहकारीसँग आवद्ध रहेका केन्द्रिय संघ, जिल्ला बचत संघ र बचत ऋण सहकारी संस्था सबैलाई समेटेको हुनाले समिटको तयारी व्यापक भएको छ।

महासंघ, नेफ्स्कुन र जिल्ला संघहरुले पनि यस प्रकारको समिट गर्ने गरेका छन् । राज्यको पुनर्संरचना पछाडि बागमती प्रोस्कुन दर्ता भएको हो । यस्ता समिट तथा गोष्ठी सबैले गर्ने गरेतापनि त्यसले सार्थकता र साझा धारणा दिन नसकेको हामीलाई महसुस भएको छ । सदस्य संस्थालाई सही मार्गदर्शन दिन सकिएन भने गोष्ठी गोष्ठीमा नै सीमित हुन्छ । तसर्थ भोलिका लागि मार्ग प्रशस्त गरेर साकोस अभियानलाई उपलब्धीमूलक बनाउन हामी लागिपरेका छौं । अहिले के सहकारी क्षेत्र समस्यामा नै हो त ? भन्ने जटिल प्रश्न खडा भएको छ । वास्तवमा अहिले जसरी प्रचार भइरहेको छ, त्यो अवस्थामा नेपालको सहकारी अभियान पुगेको छैन । समुदाय र सदस्यकेन्द्रित सहकारी संस्थाहरु विषम परिस्थितिमा पनि राम्रोसँग सञ्चालन भइरहेका छन् । शहरकेन्द्रित केहि सहकारी नीति, विधि र प्रविधिमा नचल्दा र मुल्य, मान्यता र सिद्धान्तविपरित कम्पनी मोडलमा अगाडि बढ्दा समस्या आएको हो । सहकारी संस्था आफैले बनाएको नीति, मापदण्ड, विनियम र कार्यविधि अनुसार चल्नुपर्छ । त्यो कुरा सिकाउनु छाता संघहरुको दायित्व पनि हो । त्यसका लागि बाटो निर्देश गर्नुपर्ने जरुरी ठानेर नै समिटको आयोजना गरेका हौं । यो हाम्रो बाध्यता नभई कर्तब्य हो । सामुहिक प्रतिवद्धता जारी गर्दै आगामी दिनका लागि बाटो तय गर्न समिटले टेवा पुग्नेछ ।  यो अहिलेको आवश्यकता हो । समिट अरु संघ, महासंघले गरेजस्तै त होला नि भन्ने सहभागिहरुलाई लागेको हुनसक्छ । तर त्यस्तो होइन । सबै संघसंस्था मिलेर साझा धारणा निर्माण गरिने हुँदा सहभागिता उत्साहजनक भइरहेको छ । साझा संकल्प निर्माण हुनेछ । समिटबाट साझा धारणा निर्माण गर्नेछौं र भोलिका दिनमा साकोस अभियानलाई कसरी अगाडि बढाउने भनेर बाटो तय गर्छौं । सहकारी अभियान र यससँग सम्बन्धित सबै निकायसँग जोडिएर समिट गर्न लागेकाले उपलब्धीमूलक हुने हाम्रो विश्वास छ । समिटले साझा सन्देश दिनेछ । बागमती प्रदेशका सबै साकोसहरुलाई सक्रिय सहभागिताका लागि म पून: अनुरोध गर्दछु ।