नेपाल बहुउद्देश्यीय सहकारी संस्था (एनएमसी)ले व्यवसाय विस्तार गर्ने भएको छ । यसअघि डेरी, नमूना कृषि फार्म, चिया खेती र सहकारी पसल सञ्चालन गरिरहेको एनएमसीले थप ४ वटा व्यवसाय शुरु गर्न लागेको हो । थप गरिन लागेका व्यवसाय एग्रो सपोर्ट विजनेस, प्याकेजिङ उद्योग, चामल मिल तथा तोरी मिल रहेका छन् ।
संस्थाको २९औं वार्षिक साधारण सभाको कार्यक्रमहरु सार्वजनिक गर्दै ती विषयमा संस्थाले जानकारी गराएको हो । संस्थाका अध्यक्ष रामचन्द्र उप्रेती, प्रमुख कार्यकारी अधिकृत लक्ष्मीप्रसाद उप्रेती र संचालक सदस्य डम्बरबहादुर बस्नेतले संयुक्त रुपमा वार्षिक प्रतिवेदन पुस्तिका सार्वजनिक गर्दै साधारण सभाको मिति समेत घोषणा गरेका थिए । संस्थाले असोज ३ गते देखि ९ गते सम्म क्षेत्र इकाईगत रुपमा साधारण सभा गर्ने तालिका प्रकाशन गरेको छ ।
त्यसैगरी संस्थाले बचत तथा ऋण व्यवसायको सेवा विस्तारका लागि संस्थाको स्वीकृत कार्यक्षेत्र झापा, मोरङ र इलाममध्ये चालु आर्थिक वर्षभित्र अधिकांश पालिकाहरूमा सेवाकेन्द्र विस्तार गर्ने जनाएको छ । त्यसैगरी सहकारी पसल व्यवसाय स्वीकृत कार्यक्षेत्रभित्र विस्तारलाई प्राथमिकतामा राखिएको संस्थाले जनाएको छ । कृषि व्यवसायमा आवद्ध किसानहरूका बीचमा व्यावसायिक कृषि उत्पादनमा सहयोग पुग्नेगरी, कृषि यान्त्रीकीकरणमा सहयोग पुग्नेगरी, कृषि उत्पादन लागत घटाउने र कृषि क्षेत्रको उत्पादकत्व बढाउने गरी संस्थाद्वारा सञ्चालित एकीकृत नमुना कृषि फर्म मार्फत् बेर्ना बैंक सञ्चालन, कष्टम हायरिङ सेन्टर सञ्चालन, चक्लाबन्दी खेती, सामूहिक खेती र गह्रा सुधार कार्यव्रmम संस्थाको स्वीकृत कार्यक्षेत्रभित्रका सम्भाव्य स्थानहरूमा विस्तार गरिनेछ ।
१ लाख ४ हजार ७ सय ८७ जना शेयर सदस्यहरु रहेको संस्थाको आर्थिक वर्ष २०७७/७८ सम्ममा शेयरपुँजी एक अर्ब ११ करोड ६० लाख पुगेको छ । सो अवधिमा ८ अर्व ८५ करोड ४२ लाख निक्षेप मौज्दात रहेको संस्थाको ९ अर्ब २४ करोड ६ लाख कर्जा लगानीमा रहेको छ । संस्थाले गत आर्थिक वर्षमा २७ करोड ४० लाख ६९ हजार नाफा आर्जन गरेको छ ।
