एकता बहुउद्देश्यीय सहकारी संस्थाले १९ औं वार्षिक साधारणसभा सम्पन्न गरेको छ । सभामा संस्थाकी अध्यक्ष छमकला बुढाथोकीले वार्षिक प्रतिवेदन प्रस्तुत गर्दै अर्थतन्त्रमा आएको मन्दीका कारण सहकारी संस्थाहरूले ठूलो चुनौति भोग्नु परेको बताउँदै तरलता व्यवस्थापनमा राज्यले सघाउनुपर्ने बताइन् । केहि सहकारीमा तरलता अभाव रहेपनि अधिकांश सहकारीहरूले आफ्ना सदस्यहरूलाइ नियमित सेवा प्रदान गर्दै आएको उनको भनाइ छ ।
आर्थिक वर्ष २०७८।७९ को असार मसान्तसम्म संस्थाको शेयरपुँजी ७.८३ प्रतिशतले वृद्धि भइ २ करोड २३ लाख ८१ हजार पुगेको उनले जनाइन् । त्यसैगरी संस्थाको जगेडा तथा अन्य कोषहरूमा १ करोड २२ लाख, बचत संकलन २३ करोड ८० लाख र ऋण लगानी १६ करोड ६० लाख पुगेको छ । संस्थाले महिला लघुवित्त कार्यक्रम मार्फत ५ करोड ७८ लाख लगानी गरेको हो । संस्थाले त्यस अवधिमा ३१ लाख १८ हजार मुनाफा आर्जन गर्न सफल भएको छ। संस्थाको दीगो संस्थागत विकासका लागि सुशासनलाइ अपरिहार्य ठानी त्यसलाइ प्रभावकारी रूपमा कार्यान्वयनमा ल्याएको अध्यक्ष बुढाथोकीले बताइन् ।
संस्थाले सदस्यहरूलाइ प्रविधिसँग जोड्न मोबाइ बैंकिङ सञ्चालनमा ल्याएको छ । संस्थाले यस आ।व।मा सदस्यलाइ प्रदान गरिने सेवा गुणात्मक वृद्धि गर्न बचत संकलनका नयाँ योजना ल्याउने, उत्पादनका क्षेत्र पहिचान गरी लगानी गर्ने, लघुवित्तमा आवद्ध महिला नेतृत्वलाइ आवश्यकताअनुसारको तालिम दिने भएको छ ।
