नेकपा एमालेले आगामी ५ वर्षमा नेपालको कुल गार्हस्थ उत्पादन १०० खर्ब पुर्याउने जनाएको छ । आज चुनाव घोषणापत्र सार्वजनिक गर्दै कृषिको व्यवसायीकरण, साना, मझौला तथा ठुला उद्योगको विस्तार, पर्यटनमा आधारित सेवा क्षेत्रको विस्तार गरी १०० खर्बको जीडीपी बनाउने पार्टीले जनाएको हो । ५ वर्षभित्र नेपाल भित्रिने पर्यटकको संख्या वार्षिक २५ लाख पुर्याउने एमालेको योजना छ । त्यसैगरी सो अवधिमा नेपालीको प्रतिव्यक्ति आम्दानी दोब्बर गरी २४०० डलर पुर्याउने पार्टीको योजना छ ।
दलले जितेर सरकार बनाउन पाएको खण्डमा पूरा गर्ने २० वटा ग्यारेन्टी समेटिएको एमालेको घोषणा पत्र सोल्टी होटलमा तामझामका साथ अध्यक्ष केपी शर्मा ओलीले गरेका हुन् । कर्पोरेट शैलीमा गरिएको घोषणामा हंगर नो लंगर, मंसीर ४ एमालेको सरकार, आगामी ५ वर्ष एमालेले गर्छ जस्ता चालु नारा समेटिएको छ ।
समृद्धिको नारा दिँदै आएको एमालले स्वदेशी उत्पादन र स्वदेशी उपभोगका लागि ‘मेक इन नेपाल’ अभियान सञ्चालन गर्ने, सबैको लागि काम र नियमित कमाइको सुनिश्चितता गर्ने, वर्षा याममा ५० युनिट र हिउँदमा ३० युनिट विजुली निःशुल्क उपलब्ध गराउने जनाएको छ । त्यसैगरी न्यूनतम ज्याला मासिक २५ हजार पुर्याउने घोषणापत्रमा उल्लेख छ ।
