भक्तपुरको गाम्चामा रहेको छहारी बचत तथा ऋण सहकारी आर्थिक वर्ष २०७८।०७९ मा ७६ लाख १६ हजार रुपैया खुद मुनाफा आर्जन गरेको छ ।
संस्थाको १२औं वार्षिक साधारण सभामा गत असार मसान्तसम्म शेयर सदस्य संख्या ४ हजार ९२५, शेयर पूँजी २ करोड ९३ लाख, निक्षेप संकलन रु ३० करोड ५७ गरी कर्जा लगानी रु ३५ करोड १२ लाख रहेको जानकारी दिइएको ।
सभा संस्थाका अध्यक्ष कृष्णहरि खड्काको अध्यक्षता तथा सूर्यविनायक नगरपालिकाका प्रमुख बाशुदेव थापाको प्रमुख आतिथ्यतामा सभा भएको हो । सभामा सहकारी अभियन्ता कैलाशभक्त प्रधानाङ्गको विशेष आतिथ्यता रहेको थियो ।
सभामा बोल्दै प्रमुख अतिथि थापाले छहारी साकोसले आफ्ना शेयर सदस्यहरुलाई प्रवाह गरिरहेको सेवा र स्थापना भएको छोटो समयमा यसले गरेको प्रगति प्रशंसनीय रहेको बताए । सूर्यविनायक नगरपालिकाले सहकारीहरुसँग सहकार्य गर्न तत्पर रहेको भन्दै सहकारीहरुले शेयर सदस्यहरुको जीवनस्तर उकास्ने काम गर्नुपर्ने उल्लेख गरे ।
अतिथि कैलाशभक्त प्रधानाङ्गले सहकारी संस्था समुदायमा आधारित रहेर सञ्चालन हुनु पर्ने उल्लेख गरे ।
संस्थाका अध्यक्ष खड्काले उक्त संस्थाको सञ्चालक समितिको तर्फबाट गत आर्थिक वर्ष २०७८।०७९ को वार्षिक प्रतिवेदन प्रस्तुत गर्दै संस्थाको गतिविधि तथा चालु आर्थिक वर्ष २०७९।०८०को योजना जानकारी गराए ।
सभामा सोही संस्थाका जेष्ठ सदस्यलाई सम्मान गर्नुका साथै गतसालको एसईई उत्कृष्ट नतीजा ल्याउने छात्रछात्राहरुलाई छात्रवृत्ति प्रदान गरी सम्मानित गरिएको थियो ।
