२०५४ सालको चैत्र महिनामा २८ जना युवाहरुले प्रतिव्यक्ति रु. १०० रुपैया शेयरपुँजी संकलन गरेर शुरु गरेको नयाँपाटी बचत तथा ऋण सहकारी संस्थाले हालसम्म आइपुग्दा उल्लेख्य प्रगति गर्न सफल भएको छ । नयाँपाटीको एउटा पिपलको बोटमुनि पहिलो साधारणसभा गरी २८ जनाको २८०० रुपैयाँ शेयरपुँजीबाट कारोबार शुरु गरेको संस्थाको गत आ.व. २०७८।७९ को असार मसान्तसम्म १२ करोड ८२ लाख शेयरपुँजी पुगेको छ ।
संस्थाको हालै सम्पन्न २५औं वार्षिक साधारण सभामा प्रस्तुत प्रतिवेदन अनुसार त्यस अवधिमा ८ करोड ७९ लाख संस्थागत पुँजी पुगेको छ । संस्थामा ४९८९ जना शेयर सदस्य पुगेका छन् भने संस्थाको कुल वासलात १ अर्ब १३ करोड ४८ लाख पुगेको छ । संस्थाले त्यस अवधिमा ८० करोड १२ लाख बचत संकलन गरी ९१ करोड ७३ लाख ऋण लगानी गरेको छ ।
सभामा संस्थाका अध्यक्ष गौतम खनालले “सम्पूर्ण वित्तीय समाधानको पहिलो छनौट” नयाँपाटी साकोस भन्ने परिकल्पना बोकेर स्थापना भएको संस्थाले २५औं वर्षसम्म आइपुग्दा उल्लेख्य प्रगति गर्न सकेको बताए । एउटा कोठा र टिनको ट्याङ्काबाट शुरु भएको संस्थाले यस अवधिसम्म आइपुग्दा आफ्नै भवनबाट आधुनिक र प्रविधिमैत्री वित्तीय सेवा प्रदान गरिरहेको उनले जनाए । संस्थाले सदस्यहरुलाई सहज रुपमा वित्तीय सेवा उपलब्ध गराउन एटिएम मेशिन, स्मार्ट मोबाइल बैंकिङ्ग, युटिलिटी पेमेन्ट, ३६५ दिने सेवा र रेमिट्यान्स जस्ता सेवासुविधा प्रदान गर्दै आएको उनले जनाए । सदस्यको सन्तुष्टि नै संस्थाको सफलता हो भन्ने उद्देश्यका साथ संस्था अगाडि बढाइएकाले संस्थाले यो उपलब्धी हासिल गर्न सकेको उनको भनाई छ ।
सभामा सचिव चिरञ्जीवी सिंखडाले वार्षिक प्रगति प्रतिवेदन प्रस्तुत गरेका थिए । संस्थाले लघुवित्त कार्यक्रम सञ्चालन गरेको र १५६ समुहमा गरी ३ हजार ३३७ महिलाहरु समुहमा आवद्ध भएर आय आर्जनका क्षेत्रमा लागेको उनले बताए ।
सभामा कोषाध्यक्ष बसन्तकुमार पण्डितले आ.व. २०७८।७९ को आर्थिक प्रतिवेदन प्रस्तुत गरेका थिए । संस्थाले त्यस अवधिमा बचत संकलन तथा ऋण परिचालन गरी ३ करोड ५१ लाख कुल मुनाफा आर्जन गरेको छ । संस्थाले महिला, कृषि तथा सहकारी, शिक्षा, ऋण निरीक्षण, युवा तथा खेलकूद, लघुवित्त, सूचना तथा सञ्चार, स्वास्थ्य र ऋण उपसमिति बनाइ उनीहरुमार्फत तालिम तथा गोष्ठी गर्न बजेट विनियोजन गरेको उनले बताए । संस्थाले व्यवसायिक कृषि र पशुपालनका लागि कम व्याजदरमा ३० लाख सम्म ऋण लगानी गर्ने व्यवस्था गरेको उनले जानकारी दिए ।
संस्थाले जोरपाटी र गागलफेदीमा सेवा केन्द्र स्थापना गरी सदस्यहरुलाई वित्तीय लगायत सम्पूर्ण सेवाहरु प्रदान गर्दै आएको छ ।
सभाको प्रमुख अतिथिको रुपमा बोल्दै राष्ट्रिय सहकारी महासंघका अध्यक्ष मीनराज कँडेलले पूर्वी काठमाण्डौको एक अब्बल संस्था रहेको त्यस क्षेत्रका अधिकांश जनतालाई समेटेर नयाँ पाटीले सेवा दिनुपर्ने सुझाव दिए । सहकारीमा एकिकरणको लहर शुरु भएकोले नयाँपाटी जस्तो समुदायमा आधारित संस्थाले एकिकरणको नेतृत्वदायी भूमिका खेल्न सक्ने उनले बताए । अर्थतन्त्रको तीनमध्ये एक खम्बाको रुपमा सहकारीलाई लिइएको भन्दै उनले गरिबी न्यूनिकरण गर्न र मुलुकलाई समाजवादमा पुर्याउन सहकारीको भूमिका अपरिहार्य रहेको उनले औंल्याए ।
