जनसेवा बचत तथा ऋण सहकारी संस्थाले पोखराको बगरमा पहिलो सेवा केन्द्र सञ्चालनमा ल्याएको छ । साकोसका अध्यक्ष चेतनाथ गौतमको अध्यक्षतामा भएको कार्यक्रममा प्रमुख अतिथि पृथ्वी नारायण क्याम्पसका प्राध्यापक डा. विश्वकल्याण पराजुली रहेको थिए ।
सेवा केन्द्रको उद्घाटन गर्दै प्रमुख अतिथि पराजुलीले जनसेवा सहकारीको आफ्नो छुट्टै पहिचान र विशेषता भएकोले पुरुन्चौरमा जसरी ३० बर्षको सफलता प्राप्त गरी जिल्ला र प्रदेशको उत्कृट संस्थाको रुपमा आफुलाई रुपान्तरित गरेको छ त्यसरीनै पोखरा–१ बगरबाट पनी सफल हुने कुरामा विश्वास लिएको उल्लेख गरे । गाउँको सहकारी सहरमा आउँदा केही असहजताहरु भएपनि निसंकोच आफ्ना वित्तीय सेवा प्रवाह गर्न र सहकारी अभियानको यात्रालाई निरन्तरता दिन अनुरोध गरे ।
संस्थापक सदस्य विष्णु प्रसाद अधिकारीले जनसेवा साकोसका विगतदेखि वर्तमानसम्मका उतारचढावहरुबारे जानकारी गराएका थिए । पोखरा महानगर सहकारी समितिका प्रतिनिधि नारायण प्रसाद आचार्यले जनसेवा साकोस कास्की जिल्लामा मात्र नभई गण्डकी प्रदेशमै उत्कृष्ट संस्थाको रुपमा रहेको बताए ।
साकोसका सचिव दानबहादुर भुजेलले सञ्चालन गर्नुभएको कार्यक्रममा निवर्तमान अध्यक्ष लीलाधर अधिकारीले शुभकामना मन्तव्य व्यक्त गरेका थिए भने व्यवस्थापक प्रेमसागर अधिकारीले जनसेवा साकोसका सेवाहरुबारे जानकारी गराउनुभएको थियो ।
हाल २ हजार शेयर सदस्य रहेको साकोसको कुल कारोबार रु. ३० करोड, शेयर पुँजी रु. ३ करोड, बचत रु. २३ करोड, ऋण लगानी रु. २४ करोड ५० लाख र जगेडा कोषमा रु. २ करोड पुर्याउन सफल भएको छ ।
पोखरा बजारको उत्तर ग्रामीण क्षेत्र पुरुन्चौर ३० बर्ष पहिले साकोसको स्थापना भएको थियो । ६८ जना शेयर सदस्यहरुबाट रु. ६८ हजार पुँजी संकलन गरी साकोसले सदस्य सेवा सुरु गरेको थियो ।
