‘प्रविधियुक्त, प्रतिस्पर्धी, सुरक्षित वित्तीय संस्था’ को परिकल्पनाका साथ अगाडि बढेको जनसचेतन बचत तथा ऋण सहकारी संस्थाले २९औं वार्षिक साधारणसभा सम्पन्न गरेको छ । सदस्यहरुको सहजताका लागि संस्थाले अशोज १ गतेदेखि ३ गतेसम्म १७ वटा सेवाकेन्द्रहरुमा वार्षिक प्रतिवेदनमाथि छलफल तथा सदस्य उपस्थिति गराई सभा सम्पन्न गरेको हो । सभामा अध्यक्ष हेमन्तकुमार चौलागाईंले अध्यक्षको प्रतिवेदन प्रस्तुत गर्दै २०५० सालमा सदस्यहरुको आर्थिक, सामाजिक र साँस्कृतिक स्तर अभिवृद्धि गरी समुन्नत समाज निर्माण गर्ने लक्ष्यका साथ संस्था स्थापना गरिएको स्मरण गरे ।
संस्थाले सदस्य सुरक्षा कोष गरिबसँग जनसचेतन, सदस्यहरुलाई शिक्षा तथा तालिम कार्यक्रम, गरिब तथा जेहेन्दार छात्रवृत्ति, जनसचेतन आजीवन सहारा ज्येष्ठ सदस्य सम्मान, सदस्य बीमा कार्यक्रम औषधि उपचार खर्च र प्राकृतिक प्रकोपमा सहयोग जस्ता कार्यक्रम सञ्चालन गरी सदस्यहरुलाई लाभान्वित बनाउँदै आएको उनले जनाए । संस्थाको कारोबारलाई पारदर्शी रुपमा सञ्चालन गर्न प्रविधिको प्रयोगलाई अगाडि बढाइएको र १६ वटा सेवाकेन्द्र मार्फत निःशुल्क एबीबीएस सुविधा प्रदान गर्दै आएको उनले बताए ।
संस्थाले दोलखाका दुर्गम क्षेत्रका विपन्न समुदायमा प्रभावकारी सेवा पु¥याउन लघुवित्त कार्यक्रम सञ्चालन गरेको छ भने आफ्नो कार्यक्षेत्र भित्रका सामुदायिक विद्यालय र क्याम्पसमा अध्ययनरत सदस्यका छोराछोरीहरुमध्येबाट गरिब तथा जेहेन्दार विद्यार्थीलाई आधारभूत तहमा ५० जना, माध्यमिक तहमा २० जना र क्याम्पस तहमा ५ जनालाई वार्षिक रुपमा छात्रवृत्ति प्रदान गर्दै आएको छ । त्यसैगरी ७५ वर्ष उमेर पुगेका र सदस्य सुरक्षा कोषमा भाग लिएका सदस्यहरुको जीवनयापन सहज बनाउन मासिक ५०० सहारा भत्ता प्रदान गर्दै आएको छ । गत वर्ष असार मसान्तसम्म ८७ जना सदस्यलाई ४ लाख ८७ हजार रकम उक्त शीर्षकमा संस्थाले वितरण गरेको छ ।
संस्थामा २६ हजार ५६४ सदस्य र ९६९० बाल सदस्य आवद्ध रहेका छन् । संस्थाले गत आ.व.को असार मसान्तसम्म १३.६२ प्रतिशतले शेयरपुँजी वृद्धि गरी १६ करोड २९ लाख पु¥याएको छ भने संस्थागत पुँजी १७ करोड ३५ लाख रहेको छ । संस्थाले २० प्रकारका योजनामार्फत १ अर्ब ४० करोड ३४ लाख बचत संकलन गरी १४ प्रकारका ऋण शीर्षकमा १ अर्ब ८९ करोड ५७ लाख ऋण लगानी गरेको छ । संस्थाले त्यस अवधिमा ७ करोड २१ लाख ७० हजार खुद सञ्चालन बचत गरेको छ ।
संस्थाले सदस्यलाई उपलब्ध गराउँदै आएको बस्तु तथा सेवाहरुले उनीहरुको जीवनमा पारेको प्रभावको सर्वेक्षण गर्ने भएको छ । सदस्यहरुमा उद्यमशीलता वृद्धि गर्नको लागि क्षेत्रगत रुपमा सदस्यहरु छनौट गरी व्यवसायिक तालिम प्रदान गर्ने भएको छ । संस्थाले यस आ.व. मा उद्योग स्थापना गर्न चाहने सदस्यलाई २ प्रतिशत कम ब्याजदरमा ऋण लगानी गर्ने नीति लिएको छ ।
त्यसैगरी संस्थाबाट ऋण लिइ उत्कृष्ट र नमूनायोग्य पशुपालन गर्ने सदस्यलाई संस्थामा रहेको शुन्य लागत कोषको १० प्रतिशतले हुने रकम ऋण लगानी गर्ने कार्यको थालनी गर्ने भएको छ ।
