कागेश्वरी मनोहरा नगरपालिकाले एक सहकारी एक उद्यमशीलता कार्यक्रम अगाडि बढाउने भएको छ । नगरपालिकाले नगरभित्र रहेका ७६ वटा सहकारी संस्थामार्फत् उक्त कार्यक्रम अगाडि बढाउन लागेको हो । नगरपालिकाले पत्रकार सम्मेलनको आयोजना गरी त्यस्तो कार्यक्रम अघि बढाउन लागेको जानकारी दिएको हो । जागिर खानेभन्दा उद्यमशीला विकास पालिकाको योजना भएको भन्दै नगरप्रमुख उपेन्द्र कार्कीले त्यसका लागि सहकारीमार्फत् अगाडि बढ्ने बताए । कृषि, सहकारी र महिला सशक्तिकरणको कार्यक्रमलाई उत्पादनसँग जोड्ने योजना रहेको उनले बताए । सहकारीलाई त्यसतर्फ लाग्न उत्प्रेरित गर्ने र ठूलो परिमाणमा कृषि र उत्पादन वृद्धि गर्न कार्यक्रम अगाडि बढाइने उनको भनाई छ ।
नगरपालिकाले नगर सभाबाट सहकारी ऐन र नियमावली समेत जारी गरिसकेको छ । प्रदेश कार्यक्षेत्र भएका बाहेक कागेश्वरीमा ७६ वटा संस्था क्रियाशील रहेका छन् । सहकारीको उद्देश्य नै सदस्यहरुमा उद्यमशीलता विकास गरी उनीहरुलाई आयआर्जनमा लगाउनु भएको कार्कीले बताए । तर सहकारी त्यो भन्दा बाहेकको क्रियाकलापमा लागेको पाइन्छ । उनले थपे ‘सदस्यलाई उत्पादनमा लाग्न दिइने ऋण जमानी नगरपालिका बसिदिन्छ । सदस्यले ऋण नतिरेमा उठाउन हामी सघाउँछौं ।’
सहकारीका सञ्चालक र कर्मचारीहरुको क्षमता अभिवृद्धिका लागि विभिन्न तालिम समेत सञ्चालन गरिसकेको छ भने सबै संस्थालाई कोपामिसमा आवद्ध गराउने पहल नगरपालिकाले लिएको छ । अनुगमनमार्फत संस्थाहरुलाई सुदृढ बनाउने नगरपालिकाको योजना रहेको छ । सानो क्षेत्रफलमा धेरै सहकारी हुँदा सेवा प्रवाहमा गुणस्तर नदेखिने भएकाले नगरपालिकाले सहकारीहरुबीच अभियान चलाउने समेत जनाएको छ ।
गागलफेदीमा कृषि, पशुपालन, अदुवा, बेसार, अम्लिसो, अलैंची जस्ता वस्तुको प्रचुर सम्भावना भएकाले कृषि शाखामार्फत् त्यसको अध्ययन गरी कार्यक्रम अगाडि बढाउने मेयर कार्कीले जानकारी दिए । स्थानीय उत्पादनलाई पर्यटनसँग जोडेर जाने योजना समेत रहेको उनको भनाई छ । व्यवसायिक रुपमा खेती र पशुपालन गर्ने किसानका लागि बीमा कार्यक्रम लागु गरिएको र गतवर्ष १२ लाख रुपैया बीमामार्फत् वितरण गरिएको थियो । किसानका जोखिम न्युनिकरण गर्न यो कार्यक्रमलाई थप अघि बढाइ व्यवयसायिक खेतीमा लाग्न अभिप्रेरित गर्ने नगरपालिकाको योजना छ । नगरपालिकाले यस वर्षदेखि किसान कार्ड दिने भएको छ । त्यसकै आधारमा प्रदान गरिएका विभिन्न सेवासुविधाको रेकर्ड अध्यावधिक गरिने उनले जनाए ।
