भक्तपुर जिल्ला बचत तथा ऋण सहकारी संघका व्यवस्थापक बालकृष्ण धोंजू पुरस्कृत भएका छन् । १०० औं अन्तरराष्ट्रिय सहकारी दिवसको उपलक्ष्यमा राष्ट्रिय सहकारी महासंघले उत्कृष्ट कर्मचारीको रुपमा धोंजूलाई पुरस्कृत गरेको हो । सहकारी अभियानको व्यवसायिक विकासमा कुशल व्यवस्थापकिय भूमिका निर्वाह गरेबापत धोंजूलाई उत्कृष्ट कर्मचारी पुरस्कार २०७८ बाट पुरस्कृत गरेको हो । कार्यक्रमको प्रमुख अतिथी भूमि व्यवस्था, सहकारी तथा गरिबी निवारण मन्त्री शशि श्रेष्ठले रु पच्चीस हजार र प्रमाणपत्रले उनलाई सम्मान गरेकी थिईन ।
२०६३ भाद्र २ गते कार्यालय सहायकको पदबाट भक्तपुर जिल्ला बचत तथा ऋण सहकारी संघमा प्रवेश गरेका धोंजूले सहकारी क्षेत्रको आन्तरिक र बाह्य क्षेत्रको विकासको लागि आफ्नो क्षेत्रबाट निरन्तर सक्रिय भुमिका निभाउँदै आएको छन् । संघमै रही उनले दुई बर्ष कार्यालय सहायक, तीन बर्ष प्रशासकीय अधिकृत र विगत १० बर्ष देखि व्यवस्थापकको जिम्मेवारी सम्हाल्दै आएका छन् ।करिव १५ बर्ष ९ महिना भन्दा बढीको सहकारी अनुभव हासिल गरेका धोंजूले सहकारी क्षेत्रमा आफ्नै छुटै पहिचान बनाउन सफल भएका छन् । सहकारी क्षेत्रमा धेरै राष्ट्रिय तथा अन्तराष्ट्रिय तालिम गोष्ठिहरुमा सक्रिय सहभागिता जनाई शिक्षा तथा अनुभव हासिल गरेका धोंजू आफुले सिकेका र अनुभवहरु हस्तान्तरण गर्ने क्रममा २०६४ सालदेखि सहजकर्ता भई सहकारीमा सहजीकरण समेत गर्दै आएका छन् ।
हालसम्म उनले सहकारीसंग सम्बन्धित विभिन्न विषयहरुमा हजारजना भन्दा बढीलाई तालिम तथा शिक्षा दिइसकेका छन् । सहकारीको असल अभ्यास सिकाइ तथा अनुभव आदान प्रदानका लागि उनले मेचीदेखि महाकालीसम्म र भारतको समेत भ्रमण गरिसकेका छन् ।
सहकारी क्षेत्रमा व्यवस्थापकिय सुधार, तालिम तथा शिक्षामार्फत सहकारीको संस्थागत विकास र सहकारी अभियानको सुढिद्धिकरणमा उल्लेख्य भुमिका निभाए बापत २०६८ सालमा तत्कालिन डिभिजन सहकारी कार्यालयले उत्कृष्ट व्यवस्थापकको रुपमा समेत उनलाई सम्मान गरिसकेको छ ।
सहकारी संघ संस्थाहरुबाट घेरै सम्मान तथा कदर पत्रहरु प्राप्त गरेका धोंजूको कार्यकालमा संघले २०६७ सालमा राष्ट्रिय सहकारी महासंघबाट देशभरीकै उत्कृष्ट संघ र २०६८ सालमा नेपाल बचत तथा ऋण केन्द्रीय सहकारी संघबाट देशभरीकै उत्कृष्ट बचत संघको उपाधि जित्न सफल भएको छ । हाल आएर संघले आफ्नै भवन निर्माण गरी सदस्य संस्थाहरुलाई सेवा दिइरहेको छ । आमा लक्ष्मी धोजु र बुबा श्याम कृष्ण धोंजूको जेठो पुत्रको रुपमा २०४१ मंसिर ९ गते भक्तपुर नगरपालिका वडा नं. ८, भक्तपरमा जन्मिएका धोंजूले बागिश्वरी माध्यमिक विद्यालयबाट २०५७ सालमा एस एल सी, ख्वप कलेजबाट व्यवस्थापन संकायमा स्नातक, शारदा क्याम्पसबाट प्रशासनमा एक बर्षे वि एड र शंकरदेव क्याम्पसबाट स्नाकत्तोर हाँसिल गरेका छन् ।
