सहकारी विभागले आगामी साता संशोधन सहितको एकिकृत निर्देशिका जारी गर्ने भएको छ । विभागले जेठ १२ गते ८८ बुँदाबाट घटाएर ३५ बुँदामा एकिकृत निर्देशन जारी गर्ने भएको हो । अब जारी हुने निर्देशन सहकारी अभियानले अपेक्षा गरे अनुरुप आउने छलफलमा सहभागी एक सहकारीकर्मीले जनाए ।
सहकारी अभियानका सरोकारवाला निकाय राष्ट्रिय सहकारी महासंघ, राष्ट्रिय सहकारी बैंक, नेफ्स्कुन लगायतसँग सुझाव लिएर निर्देशन परिमार्जन गरिएको छ । निर्देशन परिमार्जनका लागि विभागका उपरजिष्ट्रार टोलराज उपाध्यायको संयोजकत्वमा एक समिति बनाइएको थियो ।
यस अघिका तत्कालिन रजिष्ट्रार झलकराम अधिकारीले गएकाे फागुन १ गते ८८ बुँदे एकिकृत निर्देशन जारी गरेका थिए । उनको सरुवा माघ २८ गते नै भइसकेको अवस्थामा जारी गरिएको निर्देशन पूर्ण नभएको र तालुकदार मन्त्रालयसँग समन्वय नै नगरी आएकोले उक्त निर्देशन परिमार्जन गरिएको हो । वर्तमान रजिष्ट्रार रुद्रप्रसाद पण्डितले हतारमा जारी भएको निर्देशनमा कतिपय बुँदा अल्मलिने भएको र त्यसलाई स्पष्ट हुने गरी संशोधन सहित निर्देशन ल्याउने बताएका थिए ।
