नबिल बैंकले एनबी बैंकलाई चालु आर्थिक वर्षभित्रै एक्विजिसन गरिसक्ने रणनीतिका साथ प्रक्रियालाई तीब्रता दिएको छ ।
बैंक एक्विजिसन प्रक्रियालाई छिटोभन्दा छिटो सक्ने रणनीतिका साथ अहिले दुवै बैंकले समिति नै बनाएर काम गरिरहेका छन् । एक्विजिसनको विषयको अख्तियारी पाउनका लागि नबिल बैंकले जेठ ७ गते शनिबार बिहान ११ बजे विशेष साधारण सभा डाकेको छ।
बैंक सञ्चालक समितिको बैठकले सो दिन विशेष साधारण सभा गर्ने निर्णय गरेको हो । सभाका लागि बैंकले आगामी बैशाख ३० गते एक दिन बुक क्लोज गर्ने निर्णय गरेको छ ।
नबिल बैंकले उदयकृष्ण उपाध्याय र एनबि बैंकले इन्द्रबहादुर थापाको नेतृत्वमा मर्जर समिति बनाएको छ । समितिमा दुबै बैंकका २र२जना सञ्चालकहरु पनि छन् ।
नेपाल राष्ट्र बैंकले नबिल बैंकलाई एनबी गाभ्न गत फागुनमा सैद्धान्तिक सहमति प्रदान गरेको थियो । नबिल बैंकले एनबी बैंकलाई गाभ्नका लागि गत पुस २९ गते प्रारम्भिक सम्झौता गरेको थियो ।
एनबी बैंकको एक्विजिसन पश्चात् नबिल बैंक २३ अर्बको चुक्ता पुँजीका साथ, कर्जा लगानी, निक्षेप परिचालन, खुद मुनाफा तथा अन्य वित्तीय सूचकहरुमा अग्रणी बैंकको रुपमा स्थापित हुने देखिन्छ ।
