आर्थिक वर्षको अन्तिम त्रैमासमा बैंक तथा वित्तीय संस्थाले कर्जाको ब्याजदर बढेको छ । वाणिज्य बैंकहरुले बैंशाख महिनाका लागि सार्वजनिक गरेको कर्जाको ब्याजदर १८ प्रतिशतको हाराहारीमा पुगेको छ । अधिकांश बैंकहरुको आधार ब्याजदर १० प्रतिशतको वरपर रहेको छ । आधार दरमा बैंकहरुले ५ देखि ८ प्रतिशतसम्म प्रिमियम चार्ज गर्ने भएपछि कर्जाको ब्याजदर उच्च हुन पुगेको हो ।
सबैभन्दा कम ब्याजदर सरकारी स्वामित्व रहेका दुई वाणिज्य बैंक नेपाल बैंक र राष्ट्रिय बाणिज्य बैंकको रहेको छ । नेपाल बैंकले ११.८ प्रतिशत र राष्ट्रिय वाणिज्य बैंकको ब्याजदर ११.१४ रहेको छ । त्यसैगरी स्ट्यान्डर्ड चार्टर्ड बैंकबाट १२.४१ प्रतिशत ब्याजदरमा कर्जा दिने भएको छ। माछापुच्छ्रे बैंकले १६.८१ प्रतिशत र नेपाल एसबिआई १६.६९ प्रतिशतको उच्च ब्याजदर तोकेका छन् । स्थिर ब्याजदरका आधारमा सबैभन्दा कम कुमारी बैंकको ब्याजदर ११.७५ प्रतिशत रहेको छ भने सिभिल बैंकको ब्याजदर सबभन्दा उच्च १६.७८ प्रतिशत रहेको छ।
अन्तिम त्रैमासमा तरलता अभावका कारण बचतमा निरन्तर ब्याजदर बढाउँदै आएका बैंकहरुले अन्तिम त्रैमासमा भने बचत खाता र मुद्दतीमा दिने ब्याज बढाएका छैनन् । बचत र मुद्दतीमा यस अघि नै साढे ११ सम्म पुगिसकेको छ ।
