सहकारी अभियन्ता राजेन्द्र पौड्यालले जिल्ला सहकारी संघ ललितपुरको अध्यक्ष पदमा उमेदवारी दिएका छन् । संघको चैत्र २० गते सोमवार हुने ३०औं साधारणसभा नयाँ सञ्चालक समितिको चयन हुँदैछ ।
विगत दुई दशकभन्दा लामो समयदेखि सहकारी क्षेत्रमा क्रियाशील पौड्यालले सहकारी क्षेत्रका एक विज्ञको रुपमा पहिचान बनाइसकेका छन् । प्रारम्भिक संस्था, जिल्ला हुँदै राष्ट्रिय सहकारी महासंघमा सञ्चालक रहेर भूमिका निर्वाह गरिरहेका पौड्यालले आफुलाई सहकारीकर्मीका रुपमा मात्र सीमित राखेका छैनन् । सहकारी अभियानलाई सबल र सक्षम बनाउन पौड्यालले विभिन्न तालिम तथा प्रशिक्षण समेत दिँदै आएका छन् ।
सहकारी क्षेत्रलाई नजिकबाट बुझेका पौड्याललाई ललितपुर जिल्ला संघको अध्यक्षमा निर्वाचित गराए जिल्लाको सहकारी अभियानले थप उच्चाई हासिल गर्न सक्ने अपेक्षा गरिएको छ । ललितपुरको सहकारी अभियानलाई सबल, सक्षम र दिगो बनाई मुलुकमा नै चिनाउन आफुले पहल गर्ने अध्यक्ष पदका प्रत्यासी पौड्याल बताउँछन् ।
जिल्लाको अभियानलाई अघि बढाउन संघका थुप्रै चुनौतीहरु रहेको र त्यसलाई नजिकबाट नियालेका पौड्याललाई नेतृत्व प्रदान गर्नु उपयुक्त हुने जिल्लाका सहकारीकर्मी बताउँछन् । सहकारी मुल्य, मान्यता र सिद्धान्त अनुरुप जिल्लाको सहकारी अभियानलाई हिँडाउनका साथै वर्तमान अवस्थामा सहकारीका समस्याहरुलाई हल गरेर अघि बढ्ने सोचका साथ आफु र आफ्नो प्यानलको उमेदवारी रहेको पौड्यालले बताए ।
प्यानलबाट उपाध्यक्षमा विभुशोन शाक्य, महिला उपाध्यक्षमा इन्दिरा देवी बजगाईं, सचिवमा शशिधर पोखरेल, कोषाध्यक्षमा कर्ण देशार सहित १० जना सञ्चालक सदस्य र लेखा सुपरिवेक्षण समितिमा ३ जना रहेका छन् ।
निर्वाचनमा पौड्यालको प्यानलले प्रत्यासी केदार गोर्खालीको प्यानलसँग प्रतिस्पर्धा गर्नेछ ।
