६५ औं राष्ट्रिय सहकारी दिवस नजिकिएसँगै विभिन्न कार्यक्रमको घोषणा हुन थालेको छ । विगत दुई वर्ष कोभिड १९ का कारण खुला रुपमा कार्यक्रम हुन सकेको थिएन । यस वर्ष भने कोभिडको सामान्य अवस्था रहेकाले विभिन्न सहकारी संघसंस्थाहरुले खुल्ला कार्यक्रम समेत आयोजना गर्ने भएका छन् ।
यसै क्रममा जिल्ला सहकारी संघ, ललितपुरले अध्यक्ष माधव दुलालको संयोजकत्वमा ६५ औं राष्ट्रिय सहकारी दिवस मुल समारोह समिति गठन गरेको हो ।
दिवसको अवसर पारेर ललितपुरमा तीन दिन कार्यक्रम गर्ने समितिले निर्णय गरेको छ । चैत्र १९ गते मंगलबजारमा रक्तदान कार्यक्रम तय भएको छ । त्यस्तै २० गते प्रभातफेरी तथा संघको नवनिर्मित भवनमा दिप प्रज्वलन कार्यक्रम तय गरिएको छ । यसैगरी २१ गते ललितपुर महानगरपालिकाको सहकार्यमा सहकारी गोष्ठी, गोदावरी गाउँपालिकाको हलमा रक्तदान र सोही स्थानमा सहकारी अन्तर्क्रिया हुनेछ ।
सहकारी दिवसको दिन आआफ्नो संस्थामा विभिन्न कार्यक्रम सञ्चालन गर्न समेत संघले अनुरोध गरेको छ । सहकारी दिवसको शुभकामना व्यानर कार्यालयमा राख्नुहुन, दिप प्रन्वलन गर्नुहुन, समितिले गरेको कार्यक्रमहरुमा सहभागिता जनाउन भनिएको छ । त्यसैगरी सहकारी प्रभातफेरी कार्यक्रममा जिल्ला भरका संस्थालाई व्यानर, प्लेकार्ड, बाजागाजा तथा झाँकीसहित उपस्थिति हुन अनुरोध गरेको छ ।
नेपालको सहकारी अभियान शुभारम्भ भएको ऐतिहासिक दिनको रुपमा वि. सं. २०१३ साल चैत्र २० गतेलाई स्मरण गर्दै सहकारी दिवस मनाउने गरिएको छ ।
