नेपाल कम्युनिष्ट पार्टीका राष्ट्रिय परिषद सदस्य दण्डीराम तिमल्सिनाको चैत्र १३ गते दिउँसो सवारी दुर्घटनामा परी निधन भएको छ । अखिल नेपाल किसान यूनियनका केन्द्रिय सचिवालय सदस्य समेत रहेका उदयपुर चौडण्डी नगरपालिका बेल्टार निवासी तिमल्सिनाको गाईघाटबाट बेल्टार जाँदै गर्दा चढेको टेम्पो दुर्घटनामा परी घटनास्थलमा नै निधन भएको हो ।
स्थगित भएको नेपाल कम्युनिष्ट पार्टीको एकताको दोश्रो राष्ट्रिय सम्मेलन २०७८ चैत्र ११—१२ मा सहभागी भएर जनकपुरबाट गाईघाट हुँदै आफ्नो घर बेलटार फर्कने क्रम रहेका थिए ।
पार्टीले एक शोक वक्तब्य प्रेषित गर्दै निजको निधनबाट पार्टीपंक्ति स्तब्ध र भावबिह्वल भएको जनाएको छ । पार्टीका अध्यक्ष लोकनारायण सुवेदीले तिमल्सिनाको निधनबाट पार्टीले एक निष्ठावान, स्वाभिमानी र समर्पित अभिभावक गुमाएको जनाएको छ ।
अत्यन्तै दुःखद र संवेदनशील घडीमा नेपाल कम्युनिष्ट पार्टी तिमल्सिनाप्रति हार्दिक श्रध्दाञ्जली प्रकट गर्दै शोकाकुल पार्टी पंक्ति, परिवारजनमा गहिरो समवेदना प्रकट गरेको छ ।
दुर्घटनाको कारणबारे पूर्ण छानबिन गरी यथार्थ विवरण सार्वजनिक गर्न र पीडित परिवारलाई सान्त्वना र राहत प्रदान गर्न पनि नेपाल कम्युनिष्ट पार्टीले माग गरेको छ ।
