शहबाज खान, कपिलवस्तु
जनतालाई आवश्यक सेवासुविधा सहज तरिकाले उपलब्ध गराउनको लागि गाउँगाउँमा नै सिंहदरबार आएको भनिए पनि कपिलवस्तुको शिवराज नगरपालिका वड़ा १ चोरखोलावासीहरु पिउने पानीजस्तो आधारभूत सेवा सुविधा बाट बञ्चित रहेका छन् । पिउने पानी मात्र हैन उनीहरू सुचारू विद्युत तथा टेलिफोन सेवा नपाउँदा कष्टकर जीवनयापन गर्न बाध्य छन्।
अब भने चोरखोलावासीहरुको पिउने पानीको समस्याबाट केहि राहत पाउने भएका छन् । कपिलवस्तु क्षेत्र नं. ३ का प्रतिनिधि सभा सदस्य अभिषेक प्रताप शाहले व्यक्तिगत लगानीमा चोरखोलाका नागरिकहरूका लागि पिउने पानीको व्यवस्था गर्न लागेका हुन् ।
लामो समय देखि दूषित पानी पिउन बाध्य रहेका नागरिकहरूलाई सांसद शाहले आफूले पाउने तलब बापतको रकमले खानेपानीको व्यवस्थापन गरेको बताए । शिवराज नगरपालिका वडा नं १ मा पर्ने चोर खोलामा विद्युत् र टेलिफोन टावर लगायत अन्य समस्याहरू रहेकोले ती समस्यालाई समाधान गर्न आफूले पहल गर्ने शाहको भनाई छ ।
केही दिन अघि सांसद शाहले चोरखोला पुगेर स्थलगत अवलोकन गरेका थिए । अब चोर खोला गाउँका ३६ घर परिवारले अब शुद्ध पानी पाउने भएका हुन् । खानेपानीको उद्घाटन भने केहि दिनमा हुने जनाइएको छ ।
