तनहुँको म्याग्दे गाउँपालिका–४, मा रहेको श्री म्याग्दे दुग्ध उत्पादक सहकारी संस्था जिल्लाकै उत्कृष्ट संस्थाको रुपमा पुरस्कृत भएको छ । तनहु जिल्ला दुग्ध उत्पादक सहकारी संघले दुधको गुणस्तर फ्याट र ल्याक्टो लगायत स्वच्छ सफा दुध उत्पादन गरेको भन्दै जिल्लाकै उत्कृष्ट दुग्ध उत्पादक संस्थाको रुपमा पुरस्कृत गरेको हो ।
संघका अध्यक्ष यज्ञप्रसाद शर्माको अध्यक्षतामा भएको कार्यक्रमका प्रमुख अतिथि व्यास नगरपालिकाका मेयर बैकुण्ठ न्यौपानेले संस्थाका अध्यक्ष द्वारिकानाथ घिमिरेलाई उत्कृष्ट संस्थाको प्रमाणपत्र प्रदान गरेका थिए । संघको २३औं वार्षिक साधारणसभा र आठौं अधिवेशनको अवसरमा संस्थालाई दुध उत्पादनमा गुणस्तर कायम गरेवापत उत्कृष्टताको प्रमाणपत्र प्रदान गरिएको हो ।
सदस्यहरुबाट दैनिक एकदुई लिटर दुध संकलन गर्दै २०६४ सालमा श्रीम्याग्दे दुग्ध उत्पादक सहकारी स्थापना गरेर भएको थियो । संस्थाले प्रत्येक सदस्यबाट उत्पादित दुध संकलन गरेर जिल्ला दुग्ध सहकारी संघ दमौलीमा पठाउने गरेको संस्थाका व्यवस्थापक सञ्जीव घिमिरेले बताए । संस्थाले सिजनमा दैनिक ३०० देखि ४०० र अफसिजनमा २०० लिटरसम्म दुध संकलन गरी संघमा पठाउने गरेको छ ।
संस्थामा ४ सय सदस्य आवद्ध रहेको र तीमध्ये १०० भन्दा बढि सदस्यले गाईभैंसी पालन गर्दै आएका छन् । निर्वाहमुखी पशुपालनलाई व्यवसायिक बनाउन संस्थाले कुनैपनि शुल्क नलिइ ७ प्रतिशत ब्याजदरमै सदस्यहरुलाई सहुलियत ऋण प्रदान गर्दै आएको उनले बताए ।
‘पछिल्लो समय विदेशबाट फर्किएका १५ जना व्यवसायिक रुपमा गाईपालनमा लागेका छन्,’ उनले भने ‘पशुपालनतर्फ किसानको आकर्षण बढ्दै गएको छ ।’ सदस्यले उत्पादन गरेको दुध संस्थाले नै संकलन गर्ने गरेको र संस्थालाई दुध विक्री गर्ने सदस्यलाई मात्रै संस्थाले विभिन्न सहुलियत प्रदान गर्दै आएको उनको भनाई छ । संस्थाले स्वरोजगार कोषबाट ५० लाख रुपैया सहुलियत दरको ऋण लिएर किसान सदस्यहरुलाई लगानी गरेको थियो ।
विगतमा दुधको मात्रै कारोबार गर्दै आएको संस्थाले २०७२ बाट भने बचतऋणको समेत कारोबार गर्दै आएको छ । हाल संस्थाको कुल कारोबार १५ करोड माथि रहेको छ । संस्थाले दुधको ल्याक्टो र फ्याटको आधारमा सदस्यहरुलाई भुक्तानी दिने गर्दछ ।
