राष्ट्रिय सहकारी बैंक लिमिटेडले आर्थिक वर्ष २०७७/०७८ को कारोबारबाट शेयर सदस्य सहकारी संघ संस्थाहरुलाई १५ प्रतिशत लाभाशं वितरण गरेको छ ।
बैंकको १८ औं वार्षिक साधारणसभा सकिएकै दिन शुक्रवार बैंकले लाभाशं सदस्य संघ संस्थाको खातामा पठाएको हो ।
साधारणसभाले १५ प्रतिशत लाभाशं दिने निर्णय पारित गरेको लगत्तै बैंकले खातामा रकम पठाएको अध्यक्ष के.बी. उप्रेतीले जानकारी दिए । ‘आज साधारणसभा सकिदैछ, लाभाशं पनि आजै सहकारीहरुको खातामा पठाएका छौं’, उप्रेतीले भने ।
बैंकले यस पटकको साधारणसभा भौतिक उपस्थितिकाबीच एकाईगत रुपमा ७ वटै प्रदेशमा गरेको थियो । एकाई प्रतिनिधिहरुको साधारणसभा शुक्रबार सम्पन्न भएको र शुक्रबार नै देशभरका सहकारीहरुको खातामा लाभाशंको रकम पठाएको हो ।
बैंकले गत आर्थिक वर्ष ०७७/०७८ मा रु ३९ करोड ९५ लाख रुपैया लाभाशं वितरण गरेको छ, सहकारी बैंकले विगत ४ वर्ष देखि लगातार १५ प्रतिशत लाभांश प्रदान गर्दै आएको छ । बैंकले वितरण गरेको यो लाभांशमा संरक्षित पुँजी फिर्ता कोषबाट प्राप्त गर्ने रकम समावेश नगरिएको बैंकले जनाएको छ ।
बैंकले छिट्टै नै सदस्यहरुलाई संरक्षित पुँजीफिर्ता कोषको रकम पनि सदस्यको खातामा पठाउने तयारी गरेको जनाएको छ । बैंकले लाभांश बाहेक कारोबारका आधारमा संरक्षित पुँजीफिर्ता कोषबाट पनि सदस्य सहकारीहरुलाई रकम उपलब्ध गराउँदै आएको छ ।
