सहकारीको सन्दर्भ ब्याजदर निर्धारणका लागि बसेको बैठक बिना निष्कर्ष टुंगिएको छ । सन्दर्भ ब्याजदर निर्धारण तथा सिफारिस समितिको आज बसेको बैठक आधारहरुको विश्लेषण गर्न बाँकी रहेकाले बिना निष्कर्ष टुंगिएको सहकारी विभागका उपरजिष्ट्रार एवं प्रवक्ता टोलराज उपाध्यायले जानकारी दिए ।
ब्याजदर बढाउनको लागि आधार नपुगेर त्यसको थप अध्ययन गरेर पौष २१ बस्ने बैठकले टुंगो लगाउने उनको भनाई । सहकारी अभियान, अर्थ मन्त्रालय र राष्ट्र बैंकका प्रतिनिधिहरुको सुझावलाई एकमुष्ट गरी बजारलाई कसरी सहज बनाउन सकिन्छ त्यसैअनुरुप सन्दर्भ ब्याजदर तोकिने उनले बताए ।
ब्याजदर समग्र अर्थतन्त्रसँग जोडिने भएकाले यसको निर्धारण गर्न आफैंमा चुनौतिपूर्ण रहेको उनको भनाई छ । सहकारीको बचत अन्यत्र गएको हो वा समग्र अर्थतन्त्रमा नै समस्या रहेको हो त्यो भने अनुसन्धानकै विषय रहेको उपाध्यायको तर्क छ ।
यता वाणिज्य बैंकहरुले निक्षेपको ब्याजदर बढाउँदा सहकारीहरुलाई समेत चाप परेकाले सन्दर्भ ब्याजदर परिमार्जन भए सदस्यहरुलाई दिने बचतको ब्याज बढाइ सहकारीको पैसा सहकारी क्षेत्रमा नै रहने अवस्था बन्ने सहकारीकर्मीहरुको भनाई रहेको छ । उनीहरुले यथाशक्य छिटो ब्याजदर पुनरावलोकन गर्न आवाज उठाउँदै आएका छन् ।
