कालिमाटी तरकारी बजारमा रहेको श्री महिला तरकारी व्यवसायी बचत तथा ऋण सहकारी संस्थाको १३औं साधारणसभा सम्पन्न भएको छ । संस्थाकी अध्यक्ष तारा रेग्मी मगरको सभापतित्व एवं काठमाण्डौ महानगरपालिकाकी उपमेयर हरिप्रभा खड्गीको प्रमुख आतिथ्यमा सभा सम्पन्न भएको हो ।
सभामा बोल्दै संस्थाकी अध्यक्ष मगरले २०६५ सालमा स्थापना भएको सहकारी संस्थाले हालसम्म आउँदा उल्लेख्य फड्को मार्न सकेको बताइन् । सहकारी मुल्यमान्यता अनुरुप विभिन्न रणनीति तथा योजना अवलम्बन गरी महिला सदस्यहरुको आर्थिक उन्नतिमा टेवा पु¥याउँदै जाने र आगामी दिनमा सदस्यलाई दिने सेवाहरु समेत थप गर्दै जाने उनले बताइन् ।
संस्थाकी सचिव मेनुका नेपालले वार्षिक प्रगति प्रतिवेदन प्रस्तुत गर्दै यस आर्थिक वर्षमा सञ्चालक समिति र कर्मचारीहरको क्षमता अभिवृद्धि तालिम आयोजना गर्ने, सहकारी शिक्षा, स्वास्थ्य शिविर आयोजना, सीपमुलक तालिम दिइ उद्यमशील बनाउने र कृषि क्षेत्रलाई प्राथमिकता दिइ समुहमार्फत लगानी गर्ने बताइन् । संस्थाकी कोषाध्यक्ष गोमा रिजालले आ. व. २०७७। ७८ को आर्थिक प्रतिवेदन प्रस्तुत गर्दै संस्थाको शेयरपुँजी १ करोड ६८ लाख ८४ हजार, बचत १३ करोड ५६ लाख र ऋण लगानी १५ करोड ६२ लाख ऋण प्रवाह गरी १८ करोड ३६ लाख कुल कारोबार पुगेको बताइन् । संस्थाकी लेखा समिति संयोजक सावित्री पौडेलले समितिको प्रतिवेदन प्रस्तुत गर्दैै संस्थाले सदस्यहरुलाई बचत संकलन र ऋण प्रवाहको माध्यमबाट सेवा प्रदान गरेको बताइन् ।
संस्थाले एकल तथा ज्येष्ठ सदस्यलाई सम्मान गर्नुका साथै सदस्यहरुलाई विभिन्न शीर्षकमा राहत उपलब्ध गराउँदै आएको छ । संस्थाले बढिमा १३ प्रतिशत ब्याजदरमा सदस्यलाई ऋण प्रदान गर्दै आएको छ ।
