आर्थिक विकास मित्र बचत तथा ऋण सहकारी संस्थाले १८औं स्थापना दिवस मनाएको छ । पाँचखाल नगरपालिका–४ मा रहेको संस्थाले रक्तदान आयोजना गरी स्थापना दिवस मनाएको हो । रक्तदान जीवनदान भन्ने नाराका साथ संस्थाले आयोजना गरेको उक्त कार्यक्रममा नेपाल रेडक्रस सोसाइटी, काभ्रेले प्राविधिक सहयोग गरेको थियो । संस्थाले स्थापना दिवसकै सेरोफेरोमा स्वास्थ्य शिविर समेत आयोजना गर्ने तयारी गरेको संस्थाका प्रबन्धक ठाकुरनाथ अधिकारीले जानकारी दिए । पाँचखाल पोलिक्लिनिकसँगको समन्वयमा छातिसम्बन्धी शिविर आयोजना गर्न लागिएको उनले जनाए ।
२०६१ सालमा ३७ जना सदस्यबाट स्थापना गरिएको संस्थामा हालसम्म १२ हजार ६२३ सदस्य रहेका छन् भने कुल कारोबार ८० करोड रहेको छ । संस्थाको शेयरपुँजी ७ करोड २५ लाख, जगेडाका कोषहरुमा ७ करोड, बचत ४८ करोड र ऋण लगानी ६३ करोड रहेको छ । कार्यक्रममा संस्थाका अध्यक्ष सरोज सापकोटा, सञ्चालक समिति, कर्मचारी र सदस्यहरुको सहभागिता रहेको थियो ।
संस्थाले सदस्यहरुलाई बचतऋणका साथै गैरवित्तीय सेवा अन्तर्गत स्वास्थ्योपचा, पारिवारिक राहत, सुत्केरी खर्च, दुर्घटना बीमा र लघुबीमा जस्ता सुविधा दिँदै आएको छ । त्यसैगरी पशु, बाली बीमा कार्यक्रम, रासायनिक मल विक्री बितरण, रेमिट्यान्स र युटिलिटी पेमेन्ट लगायतका थुप्रै सेवा संस्थाले प्रदान गर्दै आएको छ । संस्थाले सदस्यहरुलाई सरल र सहज वित्तीय सेवा दिन मोबाइल बैंकिङ सेवा समेत सञ्चालनमा ल्याएको छ । समुदायमा आधारित संस्थाको रुपमा आर्थिक विकास मित्रले काभ्रे जिल्लामा छुट्टै पहिचान बनाउन सफल भएको छ ।
