कैलालीको लम्कीचुहा नगरपालिका–१ मा मुख्य कार्यालय रहेको किसान बहुउद्देश्यीय सहकारी संस्था   र टीकापुर नगरपालिका–१ स्थित ओम कृष्ण अस्पताल तथा रिसर्च सेन्टर प्रालिबीच स्वास्थ्य सेवा तथा सहुलियत प्रदान सम्बन्धी द्विपक्षीय सम्झौता  भएको छ।

‘स्वस्थ सदस्य, समृद्ध समुदाय’ भन्ने अभिप्रायका साथ  एक विशेष समारोहका बीच उक्त सम्झौता(पत्रमा औपचारिक हस्ताक्षर गरिएको हो। यस सम्झौतासँगै कैलालीको लम्कीचुहा र टीकापुर नगरपालिका, जानकी र जोशीपुर गाउँपालिका तथा बर्दियाको राजापुर नगरपालिका क्षेत्रमा बसोबास गर्ने सहकारीका २३ हजारभन्दा बढी शेयर सदस्य तथा उनीहरूका एकाघरका आश्रित परिवारजन प्रत्यक्ष रूपमा लाभान्वित हुने भएका छन्। सम्झौता–पत्रमा हस्ताक्षर पश्चात् सम्झौताको पूर्ण कार्यान्वयनको प्रतिबद्धता व्यक्त गर्दै ओम कृष्ण अस्पतालका प्रबन्ध निर्देशक कृष्णप्रसाद उपाध्याय (बजगाईं) ले समुदायमा आधारित सहकारीका सदस्यहरूलाई सहुलियत दरमा गुणस्तरीय सेवा दिन पाउँदा खुसी व्यक्त गरे । 

  संस्थाका महाप्रबन्धक डम्बर बहादुर शाहले आफ्ना सदस्यहरूलाई वित्तीय कारोबारका अलावा सामाजिक सुरक्षा र स्वास्थ्य सेवामा समेत प्रत्यक्ष टेवा पुर्‍याउने उद्देश्यले अस्पतालसँग सहकार्य गरिएको बताए । उनले सम्झौताबाट प्राप्त हुने स्वास्थ्य सहुलियतको भरपुर लाभ उठाउन सम्पूर्ण सदस्य तथा तिनका परिवारलाई आग्रह गरे । सम्झौता अनुसार दुई संस्थाको संयुक्त पहलमा समुदायस्तरमै निःशुल्क स्वास्थ्य शिविर, मातृशिशु कल्याण तथा विभिन्न स्वास्थ्य सचेतनामूलक कार्यक्रमहरू समेत सञ्चालन गरिने भएको छ।

उपचारमा १० देखि २० प्रतिशतसम्म छुट