मकवानपुरको हेटौंडामा मुख्य कार्यालय रहेको हातेमालो बचत तथा ऋण सहकारी संस्थाकी व्यवस्थापक रमला कुमारी सापकोटा बागमती प्रदेशकै उत्कृष्ट व्यवस्थापकको रुपमा सम्मानित भएकी छिन् । नेपाल बचत तथा ऋण केन्द्रीय सहकारी संघ(नेफ्स्कून) ले उनलाई बागमती प्रदेशकै उत्कृष्ट व्यवस्थापकको रुपमा सम्मानित गरेको हो । नेफ्स्कूनले ३९औं स्थापना दिवसको अवसरमा आयोजना गरेको एक कार्यक्रमकाबीच उनलाई सम्मान गरिएको थियो । 

२०६३ सालबाट सहकारी क्षेत्रमा प्रवेश गरेकी सापकोटाले सुरुका तीन बर्ष सञ्चालकको भूमिकामा रहेर काम गरिन् । त्यसपछि सोही संस्थाको कर्मचारी हुँदै हाल व्यवस्थापन प्रमुखको रुपमा काम गर्दै आएकी छिन् । उनले यो सम्मानले सहकारी क्षेत्रमा थप सक्रिय भएर लाग्न अभिप्रेरित गरेको बताइन् । आफ्नो सहकारी क्षेत्रप्रतिको लगाव र कामलाई नेफ्स्कूनले सम्मान गरेकोमा खुशीको सीमा नै नरहेको उनले प्रतिक्रिया दिइन् । संस्थागत सुशासन र सदस्यको हितको लागि काम गर्दै आएको कुरालाई यो सम्मानले प्रमाणित गरिदिएको र थप उर्जा मिलेको उनले सुनाइन् । 

हिजोको दिनमा सञ्चालकहरुले आफ्ना मान्छेलाई संस्थामा जागिर दिने र छनोट प्रक्रिया पनि सहज भएकाले  दक्ष र प्रतिस्पर्धी कर्मचारी सहकारीमा आउन नसकेको उनको भनाई छ । पछिल्लो समयमा भने नियामक निकायले समेत कर्मचारीको योग्यता र क्षमता तोकिदिएकाले सञ्चालकले सिधै कर्मचारी नियुक्त गर्न नसक्ने व्यवस्थापक सापकोटाले बताइन् । जसले गर्दा सहकारीमा काम गर्ने कर्मचारीको भविष्य उज्जवल देखेको र संस्थाहरुले समेत राम्रो सेवा सुविधा दिन थालेको सापकोटाले बताइन् । 

सहकारी बैंक भन्दा पनि फराकिलो क्षेत्र भएको र सहकारीमा आफ्नै सृजना र जोस जागँरले काम देखाउन सकिने उनको भनाई छ । समाजलाई अगाडि बढाउने उपयुक्त माध्यम सहकारी भएको र सीमित घेराभित्र मात्र बस्नु नपर्ने भएकाले समाज रुपान्तरणको सबैभन्दा राम्रो क्षेत्र सहकारी भएको उनको बुझाई छ । सहकारी व्यवसायसँगै समाज सेवा पनि भएको भन्दै उनले १६÷१७ बर्षदेखि राम्रो सम्भावना देखेर यही क्षेत्रमा काम गर्दै आएको प्रतिक्रिया दिइन् । सहकारी मार्फत् समाजलाई कसरी अगाडि बढाउने भनेर रचनात्मक तरिकाले काम गर्न सकिने भएकाले यो जागिर मात्र नभई सेवा समेत भएको उनको तर्क छ । ‘टोटल इफोर्ट’को ४० प्रतिशत पनि सहकारीमा खर्च नभएको भन्दै अझै शत्प्रतिशत इफोर्ट लगाउने हो भने परिणाम दिन सकिने उनको बुझाई छ । 

विगतमा सहकारी क्षेत्र भद्रगोलको अवस्था रहे पनि राष्ट्रिय सहकारी नियमन प्राधिकरणको स्थापनापछि यो क्षेत्र व्यवस्थित हुँदै गएको उनको भनाई छ । संस्थाले सदस्यलाई केन्द्रमा राखि सदस्यको सर्वोपरी हितका लागि काम गर्दै आएको र सोही अनुसार योजना बनाएर अगाडि बढेको उनले सुनाइन् । संस्था यस अघि पनि विभिन्न विधामा पुरस्कृत भएको, ५ हजार सदस्य पु¥याउने र संस्थाको आफ्नै भवन बनाउने योजना रहेको उनले जनाइन् । प्रविधि प्रयोगलाई उच्च प्राथमिकता दिई सदस्यको पहिलो रोजाईको संस्था बनाउन आफुहरु लागेको उनको भनाई छ ।

तीनै तहका सरकारले निर्देशन दिने गरेको भन्दै उनले बचत ऋण सहकारीलाई प्राधिकरणले मार्गदर्शन गरे उपयुक्त हुने धारणा राखिन् । मुलुकमा भएका सबै सहकारी समस्यामा छैनन् भन्नेसन्देश दिने गरी सरकारले काम गर्न उनको आग्रह छ । मुलुकको संविधानले अर्थतन्त्रको तीनमध्ये एउटा खम्बाको रुपमा सहकारीलाई लिएको र सोही अनुसार सहकारीको महत्वलाई बुझेर सहकारीमैत्री नीति निमार्ण गर्न उनको सुझाव छ । सबै सहकारीलाई एउटै डालोमा हालेर हेर्ने भन्दा पनि समुदायमा योगदान गरेका संस्थाहरुको संरक्षण गर्दै गलत गर्ने संस्थालाई कारवाही गरी यो क्षेत्रमा शुद्धिकरण ल्याउन उनको माग छ । सहकारी अभियान मर्न नदिने गरी ऐन नियमका साथै क्रार्यक्रम ल्याउन सके सहकारीले मुलुकको आर्थिक सामाजिक रुपान्तरण गर्न सक्ने उनको भनाई छ । 

गत असार मसान्तम्म संस्थाको शेयर पुँजी ६ करोड ७२ लाख, बचत संकलन ५९ करोड, ऋण लगानी ५८ करोड गरी कुल कारोबार ८० करोड पुगेको छ । संस्थामा ३ हजार १ सय सदस्य आवद्ध रहेका छन् भने एउटा सेवा केन्द्र स्थापना गरी सदस्यलाई सेवा प्रदान गर्दै आएको छ ।