नेपालपत्र संवाददाता
वाणिज्य बैंकहरूले मुद्दती निक्षेपको ब्याजदर थप घटाएका छन् । बैंकहरूले भदौ १ गतेदेखि लागू हुने गरी व्यक्तिगत तथा संस्थागत मुद्दती निक्षेपको ब्याजदर घटाएपछि औसत ब्याजदर पछिल्लो समयकै न्यून तहमा झरेको हो ।
भदौका लागि वाणिज्य बैंकहरूको औसत व्यक्तिगत मुद्दती निक्षेप ब्याजदर ०.०४ प्रतिशत बिन्दुले घटेर ४.१३ प्रतिशत कायम भएको छ । साउनमा यस्तो ब्याजदर ४.१७ प्रतिशत थियो । यसैगरी संस्थागत मुद्दती निक्षेपको औसत ब्याजदर पनि ०.०४ प्रतिशत बिन्दुले घटेर ३.०८ प्रतिशत कायम भएको छ ।
बैंकिङ प्रणालीमा पर्याप्त तरलता रहे पनि कर्जाको माग अपेक्षित रूपमा बढ्न नसक्दा बैंकहरूले निक्षेपको ब्याजदर क्रमशः घटाउँदै लगेका छन् । निक्षेपको लागत घटाउने प्रयाससँगै बैंकहरूले मुद्दती निक्षेपमा दिने प्रतिफलसमेत कम गर्दै लगेका हुन् ।
भदौमा पाँच वाणिज्य बैंकले व्यक्तिगत मुद्दती निक्षेपको ब्याजदर घटाएका छन् । नेपाल बैंक, कुमारी बैंक, सिटिजन्स बैंक, स्ट्यान्डर्ड चार्टर्ड बैंक र सिद्धार्थ बैंकले ब्याजदर घटाएका हुन् । बाँकी १५ वाणिज्य बैंकले भने साउनकै ब्याजदरलाई निरन्तरता दिएका छन् ।
ब्याजदर घट्ने क्रमले एकातर्फ निक्षेपकर्ताले पाउने प्रतिफल घटाउँदै लगेको छ भने अर्कोतर्फ बैंकहरूको लागत कम गर्ने अवस्था बनेको छ । तर, निक्षेपको ब्याजदर निरन्तर घट्दा पनि कर्जाको माग विस्तार हुन नसकेमा बैंकिङ प्रणालीमा रहेको तरलता लगानीमा रूपान्तरण गर्ने चुनौती भने कायमै रहने देखिन्छ ।
