नेपाल राष्ट्र बैंकले मौद्रिक नीतिमार्फत गरेका नयाँ व्यवस्था कार्यान्वयन गर्न बैंक तथा वित्तीय संस्थाहरुलाई निर्देशन दिएको छ । राष्ट्र बैंकले सोमबार एक परिपत्र जारी गर्दै मौद्रिक नीतिको समीक्षामार्फत् फेरबदल भएका व्यवस्था कार्यान्वयन गर्न भनेको हो ।
त्यस अनुसार अबदेखि विदेशी सामान आयात गर्दा एक पटकमा ५० हजार अमेरिकी डलर सम्मको मात्र आयात गर्न सकिनेछ । यसअघि डकुमेन्ट एगेन्स्ट पेमेन्टको माध्यम बाट गरिने आयातको सीमा १ लाख डलर रहेको थियो ।
त्यसैगरी अबदेखि सुनचाँदी ब्यवसायीले आफ्नै लागि गरगहना बनाइ बिक्री गर्न, हस्तकला लागयतका सामान बनाइ बिक्री गर्न र त्यस्ता सामान निर्यात गर्ने प्रयोजनका लागि मात्र चाँदीको आयात गर्न पाउने भएका छन् । त्यसका लागि एक पटकमा ३५ हजार डलरसम्मको मात्र चाँदी आयात गर्न पाइने व्यवस्था राष्ट्र बैंकले गरेको हो ।
गैर आवासीय नेपालीहरू तथा गैर आवासीय नेपालीहरू संलग्न विदेशी संस्थाहरुबाट विदेशी मुद्रामा निक्षेप संकलन गर्न सकिने व्यवस्थालाई सरलीकरण गरेको छ । अब गैर आवासिय नेपालीहरुको नाममा संयुक्त रुपमा खाता खोलेर निक्षेप राख्न सक्ने व्यवस्था राष्ट्र बैंकले गरेको छ । राष्ट्र बैंकले डेरिभेटिभ्स कारोबारमा ओपन अप्सन राख्न नपाइने व्यवस्था गरेको छ । निर्देशन अनुसार यस्तो कारोबार प्राथमिक पुँजीको १५ प्रतिशत मात्र गर्न पाइने भएको हो ।
गत शुक्रबार राष्ट्र बैंकले चालु बर्षको मौद्रिक नीतिको पहिलो त्रैमासिक समीक्षामा गरेको थियो।
