प्रतिनिधिसभा सदस्य निर्वाचन २०८२ लाई लक्षित गर्दै केही सञ्चार माध्यमबाट ‘चुनावी विश्लेषण’, ‘विशेष रिपोर्ट’ र ‘सर्वेक्षण’ का नाममा मतदातालाई प्रभाव पार्ने सामग्री सम्प्रेषण भइरहेको भन्दै प्रेस काउन्सिल नेपाल ले गम्भीर आपत्ति जनाएको छ । राजनीतिक दल र उम्मेदवारको नाम नै किटान गरी ‘जित्ने’, ‘लहर आएको’, ‘डेन्जर जोनमा परेको’ जस्ता दाबी गरिएका सामग्रीले आम नागरिक दिग्भ्रमित हुनुका साथै स्वच्छ र निष्पक्ष निर्वाचन प्रक्रियामा प्रतिकूल प्रभाव पार्ने काउन्सिलको ठहर छ । यस्ता आचारसंहिता विपरीत सामग्रीलाई काउन्सिलले औपचारिक रूपमा नोटिसमा राखिसकेको जनाएको छ ।

काउन्सिलका अनुसार स्रोत नखुलाइ मत सर्वेक्षणको शैलीमा समाचार सम्प्रेषण गर्दा मतदाताको गोपनीयता भङ्ग हुने, व्यक्तिगत सुरक्षामा चुनौती सिर्जना हुने र सञ्चार माध्यमको विश्वसनीयतामाथि प्रश्न उठ्ने जोखिम बढेको छ । प्रेस स्वतन्त्रताको नाममा गरिने यस्ता सामग्रीले कसैलाई लाभ वा हानि पुर्‍याउन सक्ने भन्दै काउन्सिलले पत्रकारिता पेसाको तटस्थता, निष्पक्षता र मर्यादामा गम्भीर खतरा उत्पन्न भएको चेतावनी दिएको छ ।

नेपालको संविधान, प्रेस काउन्सिल ऐन २०४८ तथा निर्वाचन आयोग ऐन २०७३ अन्तर्गत बनेका आचारसंहिताको पालना गर्नु सबै सञ्चार माध्यम र पत्रकारको दायित्व भएको स्मरण गराउँदै काउन्सिलले निर्वाचन अवधिभर थप जिम्मेवार र उत्तरदायी भूमिका निर्वाह गर्न आग्रह गरेको छ । आम मतदाताको विवेक, स्वतन्त्रता र गोप्य मताधिकारको सम्मान गर्दै स्वच्छ, स्वतन्त्र र निष्पक्ष निर्वाचनमा असर पर्ने कुनै पनि सामग्री सम्प्रेषण नगर्न/नगराउन काउन्सिलले सञ्चारकर्मी र सामाजिक सञ्जाल प्रयोगकर्तालाई समेत सचेत गराएको छ ।