नेपालपत्र संवाददाता
लगातार तीन दिनको गिरावटपछि शेयर बजारमा कोर्स करेक्सन देखिएको छ । नेपाल स्टक एक्सचेञ्ज (नेप्से) परिसूचक आज सामान्य सुधारसहित बढेको हो ।
नेप्से परिसूचक ३.२७ अङ्कले बढेर आज २५८४.४९ विन्दुमा पुगेको छ । यो अघिल्लो कारोबार दिनको तुलनामा ०.१२ प्रतिशतको वृद्धि हो । अघिल्ला केही दिनको गिरावटपछि लगानीकर्ताले खरिदतर्फ रुचि देखाउँदा बजारमा सीमित सुधार आएको विश्लेषण गरिएको छ ।
आजको कारोबारमा कुल ३ अर्ब ४२ करोड रुपैयाँ बराबरको सेयर किनबेच भएको छ । ९२ हजार ७४६ पटकको कारोबारमार्फत ३२८ कम्पनीका ७६ लाख ६८ हजार ९१५ कित्ता सेयर कारोबार भएका छन् । कारोबारमा सहभागी कम्पनीहरूमध्ये १३४ कम्पनीको सेयर मूल्य बढेको छ भने ११७ कम्पनीको मूल्य घटेको छ । बाँकी ८ कम्पनीको सेयर मूल्य स्थिर रहेको छ ।
समूहगत सूचकतर्फ हेर्दा आज सूचीकृत १३ मध्ये ७ समूहका सूचक बढेका छन् भने ६ समूहका सूचक घटेका छन् । अन्य समूहमा सबैभन्दा धेरै १.२८ प्रतिशतको वृद्धि देखिएको छ । बाँकी समूहहरूमा भने एक प्रतिशतभन्दा कमको उतारचढाव मात्र देखिएको छ ।
व्यक्तिगत कम्पनीतर्फ आज एसवाई प्यानलका लगानीकर्ताले सबैभन्दा धेरै कमाएका छन् । यस कम्पनीको सेयर मूल्य ७.०१ प्रतिशतले बढेर प्रतिकित्ता ८०६ रुपैयाँ पुगेको छ । त्यसैगरी गुराँस लघुवित्तको सेयर मूल्य ६.०१ प्रतिशत र सयपत्री हाइड्रोपावरको ५.९६ प्रतिशतले वृद्धि भएको छ। घट्ने कम्पनीतर्फ भने सिटिजन्स लाइफ इन्स्योरेन्स कम्पनीको सेयर मूल्य सबैभन्दा धेरै ५.९७ प्रतिशतले घटेको छ ।
कारोबार रकमका आधारमा पनि एसवाई प्यानल नै शीर्ष स्थानमा रह्यो । सो कम्पनीको ३० करोड ९८ लाख रुपैयाँभन्दा बढीको सेयर कारोबार भएको छ । अन्य कुनै पनि कम्पनीको कारोबार रकम १० करोड रुपैयाँ ननाघेको नेप्सेले जनाएको छ ।
